Sarmur 48

Yakub vye vok Efraim ma Manasye su

1Fafisu ri veso nasyonde ido sikofen vadir ve Yusuf i, sove: “Kma bani iduf marvak.” Inja Yusuf dun romawa vyansuya susoine Manasye ma Efraim fa skorakaki Yakub i. 2Fafis Yakub imnaf Yusuf isyama ryayov i, mura iryur samamvrav vyena kam posa kyain ro kamboi vyedi. 3Yakub ikofen faro Yusuf i, “Allah Vepoik Syadi Kaku vefasnai mankundi kwar faro aya ro Lus, ro sup Kanaan, ma eve vok aya kwar.”1 4Ikofen ve aya ra dine, “Nari Yavuk ve au romawa ma kpu sibor kaku, insa sve er vebor kaku; Nari yavuk sup mnuk ine fa vye sup mankun faro kpu besya isof fyoro fyoro.”

5Yakub ikofen pdef, “Yusuf, romawa bansuine Efraim ma Manasye wakapar kwar ro Mesir ine rofyor yarama ro dine vaim, yakor su ve romawa ayesuya raris Ruben ma Simon su. 6Nwa romawa no wer ido yakor si ve romawa wer va imboi romawa besirya; var rarwas vavov asuser sena nari sismai na ro Efraim ma Manasye su. 7Yafrur ra dirya snar yawasen kaver rosai vekur snam Rahel i. Ro marandan ayedi fyor yakaver ker Padan-Aram, sna bani imar ro sup Kanaan, fanam be Efrata, isof sneri muk kaku. Yakrir i ro diwa, ro ris nyan veso yov Efrata.” (Kur ine Efrata sap i ve Betlehem.)2

8Fafisu Yakub myam Yusuf romawa vyansuya, mura ifuken, “Romawa suine nido?”

9Yusuf kyarem be i, “Suine nido romawa Allah vyuk ve aya ro sup Mesir ine.” Yakub ikofen, “besu fa sufanam be aya insa yave vok su.” 10Yakub myam isnai mankunba snar vye mansar bos kaku inja mkassu pampan. Yusuf vye romawa ansuya fa sufris Yakub i, mura dawer epen su ma isyum su. 11Insape Yakub ikofen ve Yusuf i, “Yoverada na yasrow kuker au werva, imbape fyor ine Allah vyuk fa yasrow kuker au ma romawa bansuine.” 12Insape Yusuf dun romawa ansuya fa sukanden bur Yakub i, posa kyunem ma kyuk wepur vyansuba ro varpon kmari.

13-14Posa Yusuf vye romawa vyansuya fanam Yakub i, romawa kasun Efraim ryo var rasar ma romawa rak Manasye i ryo var raku. Imbape Yakub syopar vramin vyesuya fa var rasarya ryo Manasye vruri ma vramin var rakuya fa ryo Efraim vruri. 15Posa ido vye vok Yusuf i, ikofen radine,

“Allah, irya Manseren, sinan kpu Abraham ma kamam Ishak susyomya,

I monda vefarkin aya isof ras ine;

16I monda manakya vefaspar aya bur marindi nabor.

Ivye kada Allah ani vye vok romawa suine.

Ivye kada snonsnon ayedi, Abraham ma Ishak naser swarapepen pdef

snar romawa suine!

Ivye kada sikapar siryewen,

ma kpu sesya sibor kaku ro supswan ine.”

17Yusuf imarisen mankunba snar Yakub ryir vramin var rakuya ro Efraim vruri; inja ikanow Yakub vrasi bur Efraim vruri ma ryir i ro Manasye vruri. 18Ikofen ve kmar Yakub i, “Kamam, rarirya nawer, romawa rakya isine; rwir vramin var rakuya ro vruri.”

19Imbape Yakub imewer, inja ikofen, “Yafawi kwar, romawa yedi, yafawi kwar. Manasye papoik vyedi nari iba ma nari vye er veba. Imbape veknik vyedi papoik vyedi nari iba syadi, ma veknik vyedi kpu vyesi nari sikapar er vebor veba.”

20Insape vye vok romawa ansuyawer ro ras ani, ikofen radine, “Snonkaku Israel sya nari sap snonsnon muvena fafis sve vok snonkaku sya. Nari sikofen, ‘Ivye kada Allah ifrur fa wamnis Efraim ma Manasye.’” Rarirya Yakub vye Efraim i fa pyon, insape Manasye i.3

21Ramnai ikofen be Yusuf i, “Fyorova ido nari yamar, vape Allah nari dun kaver mko ve sup marin mkovedi. 22Faro au monda, imboi faro naek veba bansyava, yavuk Sikhem, saprop vemafen yafasyar bur kawasa Amori sya kuker romamun ayena.”