Sarmur 49

Wos papupes Yakub vyena faro romawa vyesi

1Posa Yakub dor romawa vyansi ma ikofen, “Mkoryur ro dine, fanam aya. Ive yakofen vadir rosai nari vekur mko ro fafisu nayama:

2Yakub romawa vyena mko, mkoryur,

Mkomnaf Israel, kma mkovedi.

3Ruben romawa rak ayedi, au irya sambrav ayena, bon rak ro vave snon ayena.

Au vedoser ma vesambrav syadi ro fandu romawa ayesyakam.

4Warvaren wamnis war vedaf ma vekakek,

inja au vepon rawerya wer va;

snar wenef kuker kya ayedi,

wafrur mamas mov anenef ayedi.

5Mambekanaek Simeon ma Lewi;

Romamun suvena suvuki frur mbriwer.

6Yapok yaso su ro au suvena,

rova ro do raryur suvena.

Snar masasor suvena newari sumamun,

sukaruk urek ro sapi wedoi fa ifrur marisen su.

7Fras ro masasor suvena, snar namsinba.

Dormomen suvena nasmai fras, snar nkarfiva veri.

Nari Yararwas su ro Israel kasiper.

Nari Yakakek su ro fandu er veba anya kasiper.

8Yehuda, nari wamerkar mbrov besi;

naek besi nari sisandik au

ma skunem ro varpon bedi.

9Yehuda imnis singa kuv babo;

vemun aiwan fa dan, posa vekaver ve niw vyedi;

vemnaisu ma vevarek,

snonkaku osero vaveri fa ikyaren i1

10Yehuda nari ikifepen ankyon vave sasoserya,

kpu vyesi nari sikif epen vave sasoserya isof fyoro-fyoro.

Er vebor nari sun som,

ma skunem ro bav vyedi.

11Keledai kuv vyedi nari fyes i ro aiknam,

anggur knam vepyum kaku.

Pyap sansun vyena kuker war anggur,

war anggur vefanandik brus kaku.

12Mkassu sumayar ma sufanandik syadi war anggur ma nakor vyesya sipyoper syadi sus dur.2

13Sebulon nari kyain ro swan andir;

saw payar vevrin faro wai veba;

was vyedi isof ro Sidon.

14Isakhar imnis keledai vesambrav

ve varek ro fandu aram veser roi vemarvak kaku.

15Myam mov anya ipyum kaku

ma sup anya ipyum bos veri,

mura kyankunem fa vyarsonem roi vemarvak ro kruri,

ma sveyau i fa ifararur ve manfyan.

16Imboi Dan, nari ve mankara faro er bedi,

au kako er oso ro fandu er vese ro Israel.

17Wamnis ikak vero nyan andir,

ikak vemun sayaryur ro ris nyan rayuk,

vesos kuda wekuver evewar kuda anya doper

ma snonkaku veyeki nya isapi.

18Sye Manseren Allah yave wawaf vave faspar veramuma ro Au.

19Snonkaku manfasyar sya nari sfarmun Gad i,

imbape nari iwarye fa fyasyar si.

20Asyer, au ma kpu besi nari mkosasyar rovean vesararir ma vepyum kaku,

nari fasos anan vepyum faro wairek sya.

21Naftali imnis rusa vin verafdi vefrar mura muma,

nari ikapar mkun vedoser kaku.

22Yusuf imnis keledai kuv babo, keledai verafdi vefanam war sun, vefrar farma ro urek kapis.3

23Mbrov vyesya sfarmun marsir i va,

siyau sikfo i kuker maryai ma ikoi.

24Vape Yusuf vrado vyedi syamvrav pdef,

ma maryai saren vyedi ipok kaku,

snar fanfnovek ro Manfarandous Vepok Syadi,

Allah Yakub, Manfadiren Israel.

25Ivyekada Allah, kma bani isyomya nari isaramper au; Ivyekada Vepoik Syadi kaku ro supswan ine kasiper vye vok au

kuker mekem ro mandep ma marei ro sapropya dori.

Ivyekada romawa kpu besya sibor kaku ma rofanfan besya sikapar siryewen.

26Vok ro Allah sinan kma bani

iba syadi kayan vebor ro urek bon vekain fyoro kwar anna.

Ivye kada vok annakam nasabu ro Yusuf vruri,

i monda eve manfarkin faro naek vyesi.

27Benyamin i irya naf sup vermomen.

Ro arwo babo myun maref.

Ro mun rovya irarwas na.”

28Irya wos papupes Yakub ikofen faro romawa vyesi. Ikofen wos vekakur anna faro romawa vyansya oser-oser. Romawa samfur seser di suru Yakub vyansine siso eve up ro er samfur seser di suru ro er veba Israel.

Yakub imar ma sikrir i

29-30Posa Yakub ikofen faro romawa vyansi, “Fyoro va ido nari yabur imnis raris sinan up ayansi. Mkun aya ma mkokrir aya ro ris sedi ro avyav Makhpela, ro Mamre ro sup Kanaan. Abraham kyoves avyav ma sapropya kasiper ro Efron snon Hetya fa nya ve rus. 31Ro mov ani sikrir Abraham ma Sara, Ishak ma Ribka; ma rodiya kako yakrir Lea i. 32Saprop ma avyav ani Abraham kyoves namuk i kwar ro snonkaku Het sya. Mkokrir aya ro mov ani.” 33Yakub vyuk wos ananun nane faro romawa vyesi ra posa ryir i fa vyarek ma imar.