Sarmur 50

1Yusuf ryir baken vyedi ro bo kmar Yakub i vo kyanes ma isyumi. 2Posa Yusuf iwan manfamyan vyesya fa sun mani ma rampa-rampa fa svuki vyui i insama isnarem awer. 3Fararur anya imbran ras samfur di fyak, raris ras swaf sna fa sve rampa-rampa snonkaku vemar. Kawasa Mesir ansya svarop Yakub i ras samfur di fik.

4Fafisu vavevarop anya isyonde, Yusuf ikofen faro Firaun faker vyansi, “Mkove syowi ayanido mkokofen vadir ankinem ine faro Firaun i, 5‘Ro fyor kamam fanam imarya, iwan fa yafores ve i, nari yakrir i ro rus fyasos kwar ro Kanaanya. Inja buk fa yaramura yakrir kamami. Posa nari yakaver.’ ”1

6Muraido Firaun ikofen, “Rwamura wakrir kmami raris mov fores kwar yov i raya.”

7Posa Yusuf ryamura ikrir kmari. Faker Firaun vyesya ma sinan-sinan vero aidoran vyedi ma kako amber veba vero Mesir, siso Yusuf i. 8Kina, naek, ma naek min vese vyesya sakra kako. Demir monda romawa kasun ma rofanfan sya si vekain ro Gosyen.

9Snon mamun veyek kereta ma kudasya kako siso, rarirya maran anya iba kaku.

10Fafisu sraro mov skuk pokem ro Goren-Haatad, ro war Yordan var wamuremya, sikame smandak kuker sne vemuk ma mkarem verok naba kaku. Yusuf vye varop kmar marmar vyedi ras ri fik. 11Ro fafisu kawasa Kanaan smam vave varop vero Goren-Haatad anya, mura sikofen, “Vave varop kawasa Mesir sya ifrur fafardun kaku.” Ebedar fa mov anya snir ive Abel-Misraim.2

12Irya Yakub romawa vyansya sifrur rosai Yakub danun faro si anna. 13Suni ve Kanaan fa sikrir i ro avyav Makhpela, vero Mamre var wamurem, ro yaf Abraham kyoves ro Efron snonkaku Het anya, fa nyave rus karamram.3 14Yusuf ikrir kmari ramnai, naek byesya ma snonkaku vese veyakso fa vekrir kmari ansya skaver ve Mesir.

Yusuf Vyuk Sneprei Ve Naek Vyesi

15Fafisu kma skovanya imar kwar, Yusuf naek vyansya sikofen, “Imbude Yusuf ikram kaker masasor yov ko ndi, ma nari myun su ve ko snar sasar kofrur kwar faro i ro fafisu iyafa?” 16Rarirya skankinem faro Yusuf i radine, “Ro fior sinan kovanya imar vaim, 17iwan fa nkokofen vair faro au radine, ‘Buk fakman ro sasar naek veba bansya sifrur kwar faro au ro fafisu iyafa.’ Ryani, nkoine manfamyan Allah kma kovanya isyomya, nkor fa buk fakman ro sasar nkofrurna.” Yusuf kyanes ro fafis imnaf ankinem anya. 18Posa naek vyansya srama svan suba ro varpon vyeja ma sikofen, “Nkoine women besi nko.”

19Imbape Yusuf dawos faro si, “Mkomkak awer; snar nari yafrur ra disyava snar ayaine Allah ri sayava. 20Mkona swaruser oser fa mkofrur imnis va faro aya, imbape Allah fyarwe vavyeva na kuker payamyum, insamaido raris vavyeva ro fafisu iyafa vyewari snon kaku vebor vekenem ro fafis ine sismai payamyumya. 21Mko ve virvar awer. Fandun vebor mko ma romawa mkovesya, nari yafasos na fa namawes.” Irya wos sneprei dawos faro si, isof sisnesna naknon.

Yusuf Imar

22Yusuf kyain pdef ro Mesir fnovek kina vyesya; ras kenem vyedi vye pasivarek usin oser samfur oser. 23Fafisu anya myam kaker romawa ma kpu Efraim vyesi. Yusuf ikako fafisuya fyarus Makhir romawa vyesi, isoine Manasye kpu vyesi, ve romawa mankun vyesi. 24Ikofen faro naek vyansya, “Marmar ayeja fyanam kwar, imboi Allah nari fyaduru mko ma fyarkin mko fa mkosasyar bur sup ine, ve sup Allah danun kwar kuker fafores faro Abraham, Ishak ma Yakub.” 25Posa Yusuf iwan kawasa vyansyakam fa sfores, ikofen, “Mkokarem be aya, nari fafisu Allah fyarkin mko ve sup iwa, mkun kako kor ayesi.”4 26Yusuf imar ro Mesir ro fafisu ras kenem vyeja vye pasi varek utin oser samfur oser. Svui baken vyeja kuker rampa-rampa posa srir i ro aibeiya dori.