Sarmur 44

Yusuf ifrowes vir naek vyesi

1Posa ido Yusuf ikofen faro manfamyan eve vukor ro rum vyedi, “Mkokafen pokem no ro snonkaku sine rosaser sena ra nafo, mkokafen kaver kumpan sesya ro rosaser veser pokem sanna. 2Mkokafen kako syobis sarak ayedi ro rosaser veknik vepos kawek skovedi kuker kumpan vekoves pokem vyesi.” Manfamyan ani ifrur roi ikofen anna. 3Meser myas ro arwo primya, manfamyan Yusuf vyansya srir naek vyansya kuker keledai sesya fa sibur. 4Skosasyar fa skovinkwan bur kota anya vaim, Yusuf ikofen ve manfamyan eve vukor ro rum vyani, “Waspak fa wayom snonkaku siwara. Wasrow si kwar ido, wakofen be si, ‘Amber ayani ifrur pyum yov mko. Rosai evewari mkofrur vavyeva yov i? 5Rosai evewari mkokarau syobis sarak amber ayani vyejani? Syobis anya rosaser amber ayani dinem ro ma vyuk kinsasor kako. Mkofrur sasar veba kaku!’ ”

6Fafisu mamfamyan ani isrow kuker Yusuf naek vyansya ido, dawos raris sasoser Yusuf ikofen anna. 7Imbape skarem faro i, “Amber, wakofen radirya kukro? Nkofores kaku, nkofrur ra disyava veri! 8Amber wafawi fafisu nkokaver ker Kanaan, kumpan nkosrow ro rosaser veser pokem nkovanna nkokaver si kwar ve amber au. Inja, nari nkokaraw sarak orovaido brawen ro faker wairek Mesir rum vyeja va veri! 9Amber wasrow syobis anya ro nkomindi rosaser vyeja ido, ivye vye vemun ra imar ma nkoinekam nkove manfyan ve amber au.”

10Manfamyan anya ikofen, “Ipyum; imboi mansei yasrow syobis anya roya, i monda iso eve manfyan ve aya; imboi evese mkoya ivye mkobur mura kwar.” 11Mura skosabu rosaser skovanna bur keledai skovansya ma skovas rosaser anna. 12Yusuf manfamyan vyani kyuvek rosaser anna randak ro romawa rakya isof ro romawa vepupesya, ma syobis anya isrow i ro rosaser Benyamin vyedi. 13Benyamin naek eba vyansya skarsosen kaku inja spansawek sansun sena. Sivyawen kaver rosaser sanna ro keledai sansya vo skaver ve kota.

14Fafis Yehuda ma naek vyansya sisya kwar ro Yusuf rum vyanya, Yusuf isya kaker ro diya. Mura skunem svan suba ro varpon vyedi. 15Inja Yusuf ikofen faro si, “Rosai evedar mkofrur ra dinenya? Mkofawi vae, ayaine ma nari yafawi frur mkovena vevyevana kuker kinsasor?”

16Mura Yehuda ikofen, “Rosai ive nkokofen faro amber au raya? Mov risai ive nkosampum ma nkovesano warek mankun inko raya? Sasar inkovena Allah vyasna ra nvarek pardei kwar. Inja ivye kwar, nkoine kam nkove manfyan ve amber au warpu naek kasun nkovani mkosrow syobis aninem anya roya.”

17Yusuf kyarem ve si, “Orova! Yamewer yafrur ra diryandi! Imboi mansei syobis aninem ayanya sisrowi roya i monda eve manfyan ve ayani. Evese mkoya ivye mkobur kaver ve sinan kma mkovanya kuker aski.”

Yehuda vye sano warek Benyamin i

18Yehuda imbran ve varpon fanam Yusuf i ma ikofen, “Yor fakman ro amber au, wamarisen ido buk swaf ve aya fa yawawos wer ve amber ayanawi. Wamsor awer aya; Amber au wamnis kaku ra wairek Mesir mankundi. 19Amber wafuken kwar ve inko, ‘Sinan kma mkovedi isya kaker ma mkona naek o wer fa isya?’ 20Nkokarem radine, ‘inkoveja vye mansar kwar ma veknik karyer nkovedi vye veyaven fafisu vye mansar bos kaku. Naek veba karyer vena sna oser kuker veknik nkovani imar kwar, inja kur ine demir monda vekenem kaker, inja kma inkovani vye syowi vye mamin kaku i.’ 21Amber wawan fa nkun i muma insa amber wakmam i, 22inja nkokarem be amber au vo nkove; veknik nkovanya nari isasyar vinkwan bur kma inkovanyava, snar rofyor isasyar bur kma nkovanya ido, sinan kma inkovanya nari imar. 23Mura ido amber wakofen be inko vo wove, ‘Veknik kasun inkovani nkuni fa iso nkova ido, nkopok nkomam varpon bejava.’

24Fafisu nkokaver ve sinan kma nkovani, nkove vadir roi amber wakofen anna. 25Swafo wer ido sinan kma inkovani iwan fa nkora muma wer fa nkokoves rovean no. 26Nkokarem be i, ‘Na nkora murava, snar nkun veknik nkovanyava ido nkopok nkores ro faker wairek Mesir varpon vyedi. Veknik nkovanya iso ido insape nkora mura.’ 27Sinan kma inkovanya ikofen, ‘Mkofawi kwar Rahel, swa ayani ikapar romawa ri suru monda. 28Romawa veponya ibur aya kwar. Aiwan verafdi no smun i kwar, snar isof ro ras ine yamam i werva. 29Inja mkun romawa kasun ine wer bur aya, ma royo kyur inido, marindi mkofrur yov aya ine dun marmar ve aya, snar yave mansar kwar.’”

30-31Inja Yehuda ikofen wer ve Yusuf i, “Fafis manfyan bena nkokaver ve sinan kma nkovani ma veknik nkovani ibur so inkova ido, sinan kma inkovani nari imar. Snar veknik nkovani evewar sinan kma inkovani ismai papoik fa ikenem kakerya. Ivye wer ido sinan kma inkovanya vye mansar bos kaku inja marindi nkofrur yov i anine nari vyewar marmar vyedi. 32Ramnai ido, manfyan yaine yawos namuk kwar faro sinan kma nkovani, ayaine yave sasuref sadwer i. Yakofen faro kamami radine, rofyor yun kaver kasun inkovanya ve kamam iva ido, yakamar sasar veba ine ro ras kenem ayena kasiper. 33Inja, manfyan yaine, yor ve amber au, buk fa yavarek ro dine fa yave manfyan ve amber au sadwer veknik nkovani; imbo ivye iso naek veba vyansya vo ibur. 34Mov risai nari yawos ve kamami raya rofyor veknik nkovanine isova? Manfyan yaine yasambrav va fa yamam marindi nari venyanem sinan kma nkovanyani.”