Sarmur 28

1Posa Ishak dor Yakub i, ma vye vok i vo ikofen, “Farvuk kuker vin Kanaan sine oso nawer. 2Rwa ve Padan-Aram, faro Betuel, kpu banya, insa buk mem Laban inai vyesya oso. 3Ivye kada Allah Vepoik Syadi Kaku Vye vok farvakvuk bedi ma Vyuk ve au romawa kpu sibor, rarirya nari be up faro er vebor! 4Ivye kada Manseren Allah vye vok au ma kpu besya, imnis vok Abraham ismai kwar, ivyekada nwa saprop kwain ro ine ve sup mankun bedi, saprop Allah vyuk kwar faro Abraham i!”1 5Rarirya Ishak ryir Yakub i fa ryabe Padan-Aram, faro Laban, Betuel snon Aram ani romawa vyedi. Laban i inido Yakub ma Esau sna suve Ribka srar vyedirya.

Esau fyarvuk wer

6Esau ryower ma Ishak vye vok Yakub i kwar ramnai iwani fa ibur ve Padan-Aram insa syewar vino ro diwa. Kako ro fafisu Ishak vye vok Yakub i, Ishak danun pakrek kaku Yakub i insa ipok dun vinkbor Kanaan o fa vyuk va. 7Rarirya kako Esau ifawi Yakub isoyuser wos kmari ma snar suvena, inja rya ve Padan-Aram. 8Fafisu anya insape Esau ifawi kaku kmar Ishak i, imewer kaku faro vin Kanaan sya, 9muraido Esau ibur ve Abraham romawa vye Ismael i, ma vyuk Ismael vinkbor vyedi venir ve Mahalat i fa iwarpu swa vyansuya. Mahalat inido Nebayot srar kasun vyediri.

Mafu Yakub ro Betel

10Yakub ibur Bersyeba ma rya ve Haran. 11Ro fafisu imbruk murvav, Yakub imbran raro mov oso,2 ma vyeryar ro mov ani. Fafisu ive denefya ido; dun karuiya fa nya ve afyak. 12Rofyor denef anya ido myafu, myam kakar vekaki kakuya, kyaker ro sup ine ma kakar anya ikaki kaku ra pumya ryaryas kyer mandepi, manakya sya sek sisabu ro kakar ani.3 13Ma Manseren Allah dores ro ris4 vyedi ma dawos yov i, “Aya Manseren Allah Abraham ma Ishak susyom ani, na yavuk ve au ma faro kpu besya saprop ine, mov wenef ro ine.5 14Kpu besya nari sibor simnis oref vero sup swan ine. Kpu vesya nari siryer ma skain ro sup ine ve vandivar, snar au ma kpu besya evedar nari Yave vok er vebor6 ro sup swan ine syakam.7 15Waswarepen, Aya nari vefnovek au ma vefadiren au, ro marandan bedi ma nari Yun au fa kwaver ve sup mnuk ine. Ma nari yarir auva isof yave asuser roi vebor yave asas kwar faro au nane.”

16Fafisu Yakub ikvok ro anenef vyedi, ikofen: “Kaku veri Manseren Allah isya ro dine, imboi yafawi va.” 17Imkak ma ikofen, “Mov ine ifrur kanandor kaku. Ine irya Allah rum Vyedi, ine irya kedwai nanki.”

18Meser fyase ro mun arwoya, Yakub dun karui nya ve afyak anya ma kyaker i fa dores fa vye karui swarapepen. Posa isar mani Saitun na ro bori fa vye som faro Allah i. 19Yakub nyir mov anya ve Betel.8 (fyor iwara snoriso Lus.) 20Posa Yakub vye syasi, “Manseren Allah fyaduru ma vye sano warek aya ro marandan ine, vyuk nanan ma sansun, 21isof yakaver ve kamam rum vyedi kuker payamyum ido, Manseren Allah irya Allah ayedi. 22Ma nari yavuk faro Manseren Allah I rarwas seser var samfur ro roi vebor Manseren Allah vyuk faro aya anna. Karui swarapepen yavaus anine nari vye mov samsom faro Manseren Allah I.”