Sarmur 29

Yakub isya ro Laban rum vyedi

1Muraido Yakub imbran pdef ve var wamurem, ve sup mov kawasa karyer vyesya sisya roya. 2Fafisu myam ve vandivar ido myam war veyer oso ro maper ani ma myam kako rofanfan indo veyaninem ro war anine som ri kyor sisya svarek fanam war ani. War veyer anine kerui vebaya isosef wareki. 3Rofanfan vebor ansi siryur kam ro mov anya kwar ido, manfarandous ansi simiser kerui anya bur ma spos war na fa sinem. Rofanfan ansi sinem ra posa manfarandous ansi sisisen kaver war veyer ani.

4Muraido Yakub ifuken faro manfarandous ansi, dove, “Ne naek, mko nido mkorakero?”

Skarem be i, “nkoraker Haran,”

5Yakub ifuken wer, “Inja mko fawi Laban i, Nahor kpu vyani?”

Snon ansya skarem, “Imbo, nkofawi i.”

6Yakub ifuken wer, “Rum rido vyedi ryariso?”

Skarem faro i, “Ra movo va.” “Mame, inai vye Rahel, i veyun rofanfan kmar vyesiyamani.”

7Yakub dove, “Meser kaker fafisuya imnis fa rofanfan sine sibur ve padwar vaim. Rosai vefnai fa mkove war fa sinem, posa mkorir si fa san avrisvaya?”

8Skarem yov i vo sove, “Nari rofanfan sine siryur kame insape karui veba ine vye vemiser vo nkove si fa sinem.”

9Fafisu Yakub fyawar kuker manfarandous ansya, Rahel dun rofanfan vyansya vo ryama kwar. 10Fafisu Yakub myam Rahel dun domba ansya vo imbran muma, mura Yakub ryafa ikris kerui vesosef warek war veyer anya insape pyos war nafa vye fa domba ansya sinem. 11Raimnaido isyum Rahel i vo kyanes. 12Yakub ikofen faro Rahel i, “Ribka romawa vyedi so aya, kmam srar vyediri.” Muraido Rahel ifrar ve rum fa fyawar ve kmari rosai ryower kwar ro Yakub i. 13Fafisu Laban ryower fawar vekur Yakub, fno vyanya, mura ifrar fa isrow kuker Yakub i, Laban dawrepen Yakub i vo isyumi ramnai dun Yakub I vo susun be rumya dori. Yakub fyawar asuser roi vebor nakam faro Laban i. 14Laban ikofen, “Kaku, fno karyer ayediso au.” Yakub vyarek ro rum anya paek oser.

Yakub ifararur ve Laban i insa nya Rahel ma Lea

15Ras oso Laban ikofen faro Yakub i, “Fno ayedi so au imboi, nari wapok wafararur monda ve ayava. Wakofen badir ve aya, rosai nari yavuki vyak au nya?” 16Laban nya vinkbor di suru; vebaya snoriso Lea, ma vedar kasunya snori so Rahel. 17Lea myam mayare,1 imboi Rahel baken vyeja idoser ma myam pduk kaku.

18Yakub sneri imuk kaku faro Rahel i, muraido kyarem faro Laban i, “Yamarisen yafararur pasibarek ri fik, insa imem wamarisen ido yavuk Rahel i.”

19Laban dawos faro Yakub i, “Yavuk Rahel ive au ipyum syadi ro yavuki ve snonkakuyo vese; inja kwain so aya ro dine.” 20Mura Yakub ifararur pasivarek ri fik insa nya Rahel i, vape faro Yakub mankundi pasivarek nane, namnis raris karkor ras monda, snar snewar mun vyena faro Rahel i.

21Posa ido, Yakub ikofen faro Laban i, “Pasivarek ri fik nasyonde kwar, inja imem wamarisen fa yavuk inai vinkbor bani.” 22Mura ido Laban ifrur munara farvakvukya, ma dor kawasa vero kota ansya kam. 23Imbape Fafisu rov anya, Rahel iso Laban dun murayava, imboi dun sadwer Lea i faro Yakub i ma Yakub denef kuker i. (24Laban vyuk vinfamyan oso venir ve Silpa faro Lea i insa duf farmyan i.) 25Arwori fyas ido, insape Yakub ifawi Lea i vyukya. Mura ido Yakub ikofen faro Laban i, “Imem rosai evewar be aya radinenya? Yafararur snar yave yana Rahel i! Orova voi imem wafrowes aya?”

26Laban kyarem ve Yakub i, “Rari vero dinenya kasunya ipok fyarvuk vepon ebaya va. 27Wawaf rao munara fakawawin ine isyonde ras ri fik ido insape na yavuk Rahel i ve au, imboi wafararur ve aya pasivarek ri fik wer.”

28Yakub isoyuser, inja munara farvakvuk anya ras ri fik nasyonde ido insape Laban vyuk Rahel i fa nya ve swa. (29Laban vyuk kako vinfyan vyedi venirve Bilha fa duf farmyan Rahel i.) 30Yakub denef kuker Rahel i kako, ma iswar syadi Rahel i bur Lea i. Rarirya Yakub ifararur pasivarek ri fik wer.

Yakub romawa vyesi

31Fafisu Manseren Allah myam Yakub iswar mankun Lea i va, mura Vyuk fa Lea ikapar romawa, imboi Rahel i dakkapar va. 32Lea fyadores ma daven romawa snonya. Inja ikofen, “Manseren Allah myam kwar marindi venyanem aya, randak ro ras ine swa ayani nari iswar aya.” Inja nyir romawa anya ve Ruben.2 33Lea fyadores wer ma daven romawa snonya. Lea ikofen, “Manseren Allah vyuk romawa ine ve aya wer snar Myam ma yasmai syowi va.” Mura nyir romawa anya ve Simeon.3 34Lea fyadores wer ma daven romawa snonya. Ikofen, “Fafisu ine swa ayani nari fyanam syadi ve aya snar yakapar romawa snon di kyor.” Inja nyir romawa anya ve Lewi.4 35Posa Lea fyadores wer ma daven romawa snonya. Muraido ikofen, “Rarwan ine yasandik Manseren Allah I.” Inja nyir romawa anya ve Yehuda.5 Posa ido Lea ikapar werva.