भजन 91

भगवान हमर रक्छक

1जउन सर्वसक्तिमान कर छाय हर जिघा हे बइठे रहै,

ऊ सर्वसक्तिमान कर छांय हे ठिकाना पाही।

2मै यहोबा के बारे हे कइहों, “ऊ मोर सहारा

अउ गढ हबै, ऊ मोर भगवान हबै,

मै ओखर हे यकीन रखिहों।”

3ऊ तोके बहेलिया के फांदा लग

अउ महामारी लग बचाही,

4ऊ तोके डेखना के आड हे लइ लेही,

अउ तै ओखर डेखना के तरी सरन पइहे,

ओखर सच्चाई तोर निता रक्छा अउ बचाव करही।

5तै न रात के भय लग डरिहे,

अउ न ऊ तीर लग जउन दिन के उडथै,

6अउ न ऊ मरी लग जउन अंधियार हे फइलथै,

अउ न ऊ महामारी लग जउन ऊ दिन दुपहरी हे उजाडथै।

7तोर लिघ्घो हजार मनसे,

तोर खउनी पल्ला दस हजार गिरहीं,

पय तोर लिघ्घो नेहको आही।

8पय तै अपन आंखी लग नजर करिहे

अउ बैरिन के सजा देखिहा।

9हे यहोबा, तै मोर सहारा ठहरे हबस,

तै जउन परमपरधान के अपन रहै के जिघा बनाय लय हबस।

10इहैनिता कउनो समस्या तोर हे नेहको पडी,

न कउनो दुख तोर डेरा के लिघ्घो आही।

11काखे ऊ अपन दूतन के तोर निमित आदेस दइ,

कि जिहां कहुं तै जइहे, ऊ तोर रक्छा करी।

12ऊ तोके हाथो-हाथ उठाय लइ, असना झइ होय

कि तोर गोडन हे पथरा लग ठोकर लगै।

13तै बघवा अउ सपुवा के कुचलहे,

तै जबान बघवा अउ अजगर के लतडिहे।

14ऊ मोर लग माया करे हबै, इहैनिता उके छंडाहुं, मै उके ऊंच जिघा हे रखिहों,

काखे ऊ मोर नाम के जान लय हबै।

15जब ऊ मोके गोहरई, ता मै ओखर सुनिहों,

समस्या हे मै ओखर संग रइहों,

मै उके बचायके ओखर महिमा सम्मान बढइहों।

16मै उके जादा उमर लग बढइहों, अउ अपन करे हर मुकति के दरसन

लम्बे टेम तक जीवन दइहों।