भजन 90

चउथा भाग

(भजन 90—106)

भगवान अउ मनसे

भगवान के जन मूसा कर बिनती

1हे परभु, तै पीढी लग पीढी हमर निता रहै के जिघा बनाय हबस।

2एखर लग आगू कि डोंगर पइदा हुइस,

या तै भुंइ अउ दुनिया कर रचना करे,

पय सुरुवात लग आखरी तक

तहिन भगवान हबस।

3तय मनसे के माटी हे लइ जथै,

अउ ऊ कथै, “ऊ मनसे टोरवा लउट जा।”

4तोर नजर हे हजार साल

बीते कल के चीज हबै,

ऊ रात के अक्ठी टेम के जसना हबै।1

5तय मनसे के बहाय लय जथै,

ऊ नींद लग ठहराथै,

ऊ चारा के जसना हबै जउन सकरहा लहलहाथै,

6ऊ सकरहा फूलथै, अउ लहलहाथै,

पय सांझ के मुरझाय के झुर्राय जथै।

7हम गुस्सा लग भस्म हुइ गय हबै,

तोर जलजलाहट लग हम डर गय हबन।

8तय हमर सगलू अपराधन के आगू रख दय,

हमर हर पापन के अपन उपस्थिति के उजियार हे रख दय।

9तोर गुस्सा हे हमर रोज काटे हबै,

हम अपन दुख लग जीवन बिताय हबन।

10हमर उमर के साल सत्तर हबै,

अगर बल के कारन अस्सी साल हुइ जाय,

तउमा उनखर घमंड दुख अउ कस्ट हे बिताय हबै।

उ हरबी मउजूद हुइ जथै, अउ हमर परान उड जथै।

11तोर केतका सेबक गुस्सा के सक्ति के जान सकथै,

तोर डर योग गुस्सा के कउन अनुभव कर सकथै?

12परभु, हमके सिखो कि हमर उमर के रोज केतका कम हबै,

अउ ऊ हम बुध्दिमान मन जाय।

13हे परभु, लउट आ। कब तक?

तय अपन सेबकन हे दया कर।

14तय सकरहा टेम अपन करुना लग हमके राजी कर,

जसना हम जीवन भर जयजयकार करी, अउ खुसी मनाइ।

15तय हमर जीवन हे बोहत दुख दय,

अब हमके खुस कर दे।

16तोर काम तोर सेबकन पय,

तोर चमक उनखर लरका परगट होय।

17हमर मालिक भगवान के किरपा होय, जउन काम हम करे हबै,

उनही सफल कर। जरूर परभु, तय हमर काम के सफल कर।