Bhumiya
भजन 89
देस समस्या के टेम स्तुति गाना
एजरा वंसी एतान के मसकील
परभु, मै तोर करुना माया के गाना गात रहों,
मै अपन मुंह लग तोर सच्चाई पीढी लग पीढी घोसना करत रहों।
मै हइ जानथो , तोर करुना सदा-सरबदा के निता ठहरे हबै,
तोर सच्चाई आकास के जसना स्थाई हबै।
भगवान कथै, मै अपन चुने हर राजा के संग अक्ठी टीमा करे हबै।
अपन सेबक दाऊद के मै बचन दय हबै।
मै तोर बंस के उमर लग उमर तक ठहराय रखिहों,
ओखर सिंहासन के पीढी लग पीढी तक बनाय रखिहों।
हे परभु, स्वरग तोर अदभुत कामन के गुनगान करिस,
पवितर बिस्वासी के मंडली हे ऊ तोर सच्चाई के गुनगान करिस।
आकास-मंडल हे परभु के बरोबर कोन हबै?
स्वरगदूतन हे कोन यहोबा कर चीज हुइ सकथै?
भगवान पवितर बिस्वासी के मंडली हे भयानक हबै,
ऊ अपन चउगिरदा पल्ला रहै बालेन हे महान अउ डरै बाले हबै।
हे परभु, स्वरग के भगवान, तोर जसना अउ सक्तिसाली कउनो हबै?
हे परभु, तोर चउगिरदा पल्ला तोर सच्चाई हबै।
तय उफान बाले समुंदर हे सासन करे हबै,
ओखर तरंग लहरा के सांत करे हबै।
हे भगवान, तय रहब के हराय रथस।
तय अपन ताकत लग अपन बैरिन के फइलाय दय।
आकास तोर हबै, भुंइ तोर हबै, दुनिया अउ जउन कुछु ओहमा हबै,
उके तहिन स्थिर करे हबस।
तहिन सगलू कुछ उत्तर दक्छिन बनाय हबै।
ताबोर अउ हेर्मोन डोंगर तोर नाम के जयजयकार करथै।
तोर भुजा बलवान हबै, तोर हाथ सक्तिसाली हबै,
तोर दहिना हाथ परबल हबै।
नियाइपन अउ नियाव तोर सिंहासन के मूल हबै,
करुना अउ सच्चाई तोर आगू-आगू रेंगे हबै।
हे परभु धन्य हबै, उन मनसे जउन केतका मगन हबै, जउन गाना लग तोर भजन करथै,
जउन तोर उपस्थिति के उजेड हे रथै।
ऊ तोर नाम के कारन मगन रथै,
अउ तोर नियाइपन के कारन तोर भजन करथै।
काखे तै उनखर सक्ति के सोभा हबस,
तोर किरपा लग हमार मूंड ऊंच होथै।
हे भगवान, तहिन हमर ढाल हबै,
इस्राएल के ऊ पवितर हमर राजा हबै।
भगवान कर टीमा दाऊद कर संग
तय पुरान टेम हे अपन भक्त लग दरसन हे हइ कथै,
मै सक्तिसाली डउका के मूंड हे मुकुट धरे हबै,
मै परजा के मनसे मसे अक्ठी डउका के चुने अउ ओखर उन्नत करे हबै।
मै अपन सेबक दाऊद के खोज लय हबो,
अपन पवितर तेल लग ओखर अभिसेक करे हव।1
पय मोर हाथ ओखर हे स्थिर रही,
मोर भुजा उके मजबूत बनाही।
बैरी ओही हराय नेहको सकही,
अउ न बइमान मनसे उके पीरा पहुंचाही।
मै ओखर आगू हे मै ओखर बैरी के नास करिहों,
मै ओखर बैरिन के मार डरिहों।
मोर सच्चाई अउ करुना ओखर संग रही,
मोर नाम लग ओखर मूंड ऊंच होही।
मै ओखर इलाका के बीच सागर तक
ओखर भुजबल के महानदी तक ठाड रखिहों।
ऊ मोर लग कथै,
तय मोर बाफ हबै। तय मोर भगवान,
चट्टान मोर मुकतिदाता हबै।
मै ओही पहिलउठा टोरवा,
भुंइ के राजा हे सब लग ऊंचा बनइहों।
मै ओखर परति सदा करुना करत रइहों,
अउ मोर टीमा ओखर निता बने रही।
मै ओखर परवार के सदा बनाय रखिहों,
अउ ओखर राजगद्दी स्वरग के जसना हरमेसा बनाय रही।
अगर ओखर परवार के मनसे मोर नियम के छांडै,
अउ मोर नियम हे न चलै।
अगर ऊ मोर बिधि के उल्लंघन करहीं,
अउ मोर आदेस के न मानै,
ता मै उनखर पाप के सजा सोटा लग,
अउ उनखर अपराध के सजा कोडा लग दइहों।
पय मै अपन करुना लग नेहको हटइहों,
अउ न बिस्वासओग छांड के झूठा बेउहार नेहको करिहों।
मै अपन टीमा न टोरिहों,
अउ जउन मोर बिबडा लग निकर चुके हबै, ओही न बदलिहों।
अक बार मै अपन पवितर के किरिया खाय चुके हव,
दाऊद के कबहुन धोखा नेहको देहुं।
ओखर परवार हरमेसा रही,
अउ ओखर राजगद्दी बेरा के जसना मोर आगू ठहरे रही।
ऊ जोनाइहा के जसना,
अउ आकासमंडल के बिस्वासओग गवाह के जसना सदा बने रही।
राजा के हार हे दुख
तउमा तै अपन अभिसिक्त के छांडे अउ ओही असुइकार कर दइस,
अउ ओही बोहत गुस्सा करे हबै।
तय अपन सेबक के संग अपन टीमा के छांड दइस,
तय ओखर मुकुट के भुंइ हे गिराय के असुध्द कर दइस।
तय ओखर सगलू बाडन के टोर डारे हबस,
अउ ओखर किला के उजाड दय हबै।
सगलू गली हे रेंगै बाले मनसे ओखर लूट लय हबै,
अउ ओखर परोसी हे ओखर बदनाम होथै।
तय ओखर बिरोधिन के परबल करे,
अउ ओखर सगलू बैरिन के मगन करे हबस।
फेर तय ओखर तलबार के धार के मोड देथै,
अउ झगडा हे ओखर गोड के जमाय नेहको देय।
तय ओखर तेज हर लय हबै,
अउ ओखर सिंहासन के भुंइ हे गिराय दय हबै।
तय ओखर जबान के दिनन के घटाय दइस,
अउ उके हराय के लाज लग गढे जाय दइस।
छंडामै कर निता बिनती
हे यहोबा, कब तक? का तै सदा खुद के लुकोय रखिहे?
कब तक तोर गुस्सा आगी जसना जलत रइहे?
हे मालिक, सुरता कर, जीवनकाल केतका बेकार हबै,
तय सगलू मनसे के नास करे के पइदा करे हबै।
असना कउन मनसे हबै, जउन सदा जिंदा रहै,
अउ मिरतू के नेहको देखै? कउन मनसे मिरतू के दुनिया के हाथ लग अपन परान बचाय सकथै?
हे मालिक, कछो हबै तोर पुरान टेम के करुना,
जेखर किरिया तय सेबक दाऊद लग सच्चाई लग खाय रथै?
हे मालिक, अपन सेबक के बुराई याद कर,
मै कसके अपन हरदय हे राज के बदनाम सहत रइहों।
हे परभु, तोर बैरी मोर बुराई करे हबै
उनही अभिसेक राजा के बार-बार बदनाम करे हबै।
भगवान, सदा धन्य हबै। आमीन, आमीन।
Source notes (1)
- Cross-reference 1 समु 13:14; प्रेरितो 13:22
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.