भजन 88

मदत के निता बिनती

गाना, कोरह वंस कर भजन। परधान बजामैबाले कर निता, महलतग्रोत राग हे एजरा वंस हेमान कर मस्कील

1हे परभु, मोर उध्दार करता भगवान,

मै तोर आगू दिन-रात दुहाई देथो।

2मोर बिनती तोर आगू पहुंचै,

तय मोर पीरा-आरो हे कान लगाय दय।

3मै अपन पीडन लग तंग होय चुके हव।

बस मै हरबी मर जहुं।

4मै मरघटी के खोदरा हे जाय बाले हे गिने गय,

मै कमजोर डउका के चीज हबो,

5मोर निता मरे मनसे हे डाटथै,

मै उहै मुरदा जसना हबो जउन मरघटी हे सोय हबै,

अउ मनसे ओखर बारे हे

सगलू कुछ भूलाय गय।

6तय मोके मरघटी के गढहा हे

अंधियार गहिरा जिघा हे डारे हबै।

7तोर गुस्सा मोर हे बने हर हबै,

तै अपन सब लहर लग मोके दुख दय हबस।

8तय मोर पहिचानबालेन के मोर लग दुरिहां कर दय हबै,

उनखर निता मोके नफरत के बनाय दय हबै।

मै बंधुवा हव, अउ भग नेहको सको,

9पीरा के कारन मोर आंख हे धुंधरा पडे हबै।

हे परभु, मै तोके रोज दिन गोहरथो,

अपन हाथ तोर पल्ला फइलाथो।

10काखे तय मिरतू के निता आसा दे बाले करम करे हबै?

काखे मुरदा उठ के तोर स्तुति करे हबै?

11काखे खबर हे तोर करुना के,

बिनास के दुनिया हे तोर सच्चाई के वरनन हुइ सकथै?

12का तोर अदभुत काम अंधियार हे,

या तोर धरम बिस्वासघात कर दसा हे जाने जही?

13परभु, मै तोर दुहाई देथो,

सकरहा मोर बिनती तोर आगू पहुंचे हबै।

14हे परभु, तय काखे मोके छांड रहै?

काखे तय अपन मुंह मोर लग लुकोय हबै?

15मै कमजोर अउ रोगही रहों।

मै बचपना लग तोर गुस्सा के भोगे हबै। मोर सहारा कउनो नेहको रहै।

16हे भगवान, तय मोर हे गुस्सा हबै

अउ तोर सजा मोके मारे हबै।

17ऊ जल के अथाह के चीज मोके घेरे हबै,

उनही मिलोय के मोके घेर लय हबै।

18तय मोर डिगरी सखा अउ संगी के मोर लग दुरिहां कर दय हबै,

अउ उन अंधकार के लिघ्घो हबै।