निरगमन 14

लाल समुन्दर नकिन

1यहोबा मूसा लग कथै, 2तै इस्राएलिन के गुठे कि उन पाछु लउटके मिगदोल सहर अउ समुन्दर के बीच हे स्थित पिहाहीरोत नगर के आगू बालसपोन के आगू तम्बू डालिन, तुम समुन्दर के बीच हे तम्बू डलिहा। 3फिरोन इस्राएलिन के बारे हे गुठेही, “उन दूसर देस हे भटकके चकराय गय हबै, रतेहली परदेस उनके घेर लय हबै। 4मै फिरोन के हिरदय के कठोर बनाय देहुं, अउ इस्रालिन के पाछु करी, तब मै फिरोन अउ ओखर सगलू सुपाही के हरायके अपन महिमा कराहूं जेखर लग मिस्र के रहैबाले जान लइहीं कि मै यहोबा हव,” अउ इस्राएली ओसनेन करिन। 5जब मिस्र देस के राजा के गुठे गइस, कि इस्राएली भाग गइन, तब उनखर परति फिरोन अउ ओखर हरवाह के मन बदल गइस उन गुठे लगिन, हम काहिन करेन कि इस्रालिन के गुलामी लग मुक्त करके जाय दयन? 6तब फिरोन अपन रथ तइयार करवाइस अउ अपन संग सुपाहिन के लइस। 7ऊ छय सव चुनेहर रथ लइस, अउ मिस्र देस के सगलू दूसर रथ लइन जिनखर हे सबके साहेब ठहराइस। 8यहोबा मिस्र देस के राजा फिरोन के हिरदय के हठीला बनाय दिहिस, इहैनिता ऊ इस्राएलिन के पाछू करिन, पय इस्राएली बिना डरे आगू बढत गइन।1 9सगलू मिस्र देस के रहैबाले फिरोन के संग घोडवा रथ अउ सबारी समेत मिस्री सुपाही उनखर पाछु करिन, अउ बालसपोन के आगू पिहाहीरोत के लिघ्घो, जिहां, इस्राएली समुन्दर के टाठा हे तम्बू डाले रथै, उछो जाय पहुंचिन। 10जब फिरोन लिघ्घो आइस, इस्रालिन अपन-अपन आंखी उठायके देखिस कि सगलू मिस्री मनसे उनखर पाछु करथै, अउ इस्राएली बोहत डर गइन, अउ चिल्‍लायके यहोबा कर दोहाई दइन। 11इस्राएली मूसा लग कथै, का मिस्र देस हे मरघटी के कमी रथै, जउन तै हमके रतेहली परदेस हे मरै के निता लइ आने? तै हमके मिस्र देस लग निकाड के हमर संग हइ का करिस? 12का हम तोर लग मिस्र देस हे हइ नेहको कहे रथै, “हमर लिघ्घो लग कढ जा, हमके मिस्र के रहैबालेन के गुलामी करै दे?” हमर निता हइ निक्खा होतिस कि हम रतेहली परदेस हे मरै के निक्खा तउन मिस्र के रहैबालेन के गुलामी करतन।2 13मूसा इस्राएलिन लग कथै, झइ डेरा बेधडक ठाड रहा, अउ यहोबा के मुकति के काम देखा, जेही ऊ आज तुम्हर निता करी, जउन मिस्र के रहैबाले के आज तुम देखथा, उनके कबहुन नेहको देखिहा। 14यहोबा तुम्हर निता लडी तुम बलुक सान्त रहा। 15तब यहोबा मूसा लग कथै, तै मोर दुहाइ काखे देथस? इस्राएलिन के आगू बढै के आदेस दे। 16अउ तै अपन डन्डा उठाय के अपन हाथ समुन्दर के पल्ला बढा अउ उके दुइ भाग हे बांटके जेखर लग इस्राएली समुन्दर के बीच सुखाय हर भुंइ हे जाय सकै। 17मै मिस्र के रहैबालेन के हिरदय कठोर कर देहु, जेखर लग उन इस्राएलिन के पाछु करत समुन्दर के बीच जाय, तब मै फिरोन ओखर सगलू सुपाही ओखर रथन अउ घुडसवारन के नास करके अपन महिमा कराहूं। 18जब मै फिरोन ओखर रथ घुडसवारन हे जीत देबइहों, तब मिस्र के रहैबाले के सुरता हुइ कि मै यहोबा हबो। 19तब इस्राएलिन के आगू-आगू चलै बाले भगवान के दूत हटके उनखर सुपाहिन के पाछु कढ गइन, अउ बादर के खंभा उनखर आगू लग हटके उनखर पाछु ठाड हुइ गइस। 20इहैमेर उन इस्राएलिन के सुपाही मिस्र के सुपाहिन के बीच हे आय गइन उहां बादर अउ अंधियार रथै, तउमा रात हे उनही उजियार मिलथै, पय दुनो सुपाही रात हे अक दूसर के लिघ्घो नेहको आय सकिन। 21तब मूसा समुन्दर के पल्ला अपन हाथ फइलाइस, परभु रात भर पुरवइया हवा चलाय के समुन्दर के पाछु हटाय दइस, समुन्दर के पानी दुइ भाग हे बटर जथै। 22इस्राएली समुन्दर के बीच झुराय हर भुंइ हे चलके गइन, पानी उनखर दहिना पल्ला अउ टेटरा पल्ला भीठी बनके ठाड रथै।3 23तब मिस्र के रहैबाले उनखर पाछु करिन फिरोन के रथ, घोडा अउ घुडसवार उनखर पाछु-पाछु समुन्दर के बीच हे कढ गइन। 24अउ रात के आखरी पहर हे परभु आगी अउ बादर के खम्भा मसे मिस्र के सुपाही देखथै, परभु मिस्र के सुपाही के घबराय दइस। 25ऊ उनखर रथ के पहिया के धसाय दइस, जेखर लग उनखर चलना कठिन हुइ गइस मिस्र के रहैबाले गुठे लगिन आबा, इस्राएलिन के लिघ्घो लग भग जाय, काखे परभु उनखर पल्ला लग हमर लग युध्द करथै। 26परभु मूसा लग कथै, अपन हाथ समुन्दर के पल्ला फइला जेखर लग पानी मिस्री मनसे हे उनखर रथ अउ घुडसवार हे पानी लउट आबै 27मूसा समुन्दर के पल्ला अपन हाथ फइलाइस सुबेन्ने होत-होत समुन्दर अपन पहिले के जिघा हे फेरै आय गइस, जब मिस्री मनसे ओहमा भागथै, तब परभु उनके समुन्दर हे बहाय दइस। 28पानी अपन जिघा छो लउटिस अउ रथ घुडसवार अउ फिरोन के सगलू सिपाही के जउन समुन्दर के बीच इस्राएलिन के पाछु करे रथै बुडाय दइस, उनखर मसे अक्कोठे नेहको बचथै। 29पय इस्राएली समुन्दर के बीच झुराय हर भुंइ हे चलके पार हुइ गइन, पानी उनखर दहिना पल्ला अउ टेटरा पल्ला भीठी बनके ठाड रथै। 30ऊ रोज मिस्र के रहैबाले के हाथ लग इस्राएलिन के छंडाइस, इस्राएली मिस्र के रहैबाले के समुन्दर के टाठा मरे पडे देखथै। 31अउ भगवान मिस्र के मनसेन हे जउन अपन पराक्रम दिखाय रथै, उके देखके इस्राएली भगवान के भय मानथै अउ भगवान हे अउ ओखर हरवाह मूसा हे यकीन करिस।