निरगमन 13

जेठ टोरवा के अरपन

1यहोबा मूसा लग कथै, 2सगलू जेठ लरका के मोके अरपित करा, सगलू लरका जउन इस्राएल हे जेठ हबै, चाहे मनसे के होय या पसु कर उन मोर हबै।1

बिगर अखमीरी रोटी कर तेउहार

3मूसा इस्रालिन लग कथै, हइ रोज के सुरता करा, हइ रोज तुम मिस्र देस लग गुलाम के घर लग निकरे रथै, परभु अपन बल लग तुमके ऊ जिघा लग बाहिर निकाडिस, हइ रोज खमीरी रोटी नेहको खाय जही। 4अबीब के महिना हे पहिले रोज तुम निकडे हबा। 5जब परभु तुमके कनानी, हित्ती, एमोरी, हिव्वी अउ यबूसी मनसेन के देस हे लइ जही, जेही देय के किरिया ऊ तुम्हर सियान लग खाय रथै, जेहमा दूध अउ सहद के धारा बहथै, तब तुम इहै महिना हे तेउहार मानबे। 6तुम सात रोज बिना अखमीरी रोटी खाबे, अउ सात रोज परभु के निता तेउहार मानबे। 7सात रोज तक अखमीरी रोटी खाय जही, अउ खमीरी रोटी तुम्हर लिघ्घो झइ दिखाइ दे, इहां तक कि सगलू देस हे तुम्हर लिघ्घो नेहको दिखही। 8तै अपन टोरवन के ऊ रोज हइ कहिके समझाबे, “जब मै मिस्र देस लग निकरे रहों, तब परभु मोर निता जउन करिस ओखर सुरता हे हइ तेउहार बनाय जथै।” 9ऊ तोर हाथ हे अक्ठी निसानी अउ तोर दुनो आंखी के बीच यादगार होही, जेखर लग परभु के नियम तोर मुंह हे रही, काखे परभु बलवान हाथन लग तोके मिस्र देस लग बाहिर निकारे हबै। 10हइ कारन तै हइ नियम के पालन हर साल सही टेम हे करत रइहा।

जेठ टोरवा

11जब यहोबा तोके कनानी देस हे लइ आइस जेखर किरिया ऊ तोर लग अउ तोर सियानन लग खाय रथै, अउ जब ऊ देस तोके देही, 12तब तै सगलू जेठ टोरवा के परभु के निता अलगे करबे, तोर पसुन के सगलू पहिलउठा लरका परभु के होही।2 13तै गदहा के सगलू पहिलउठा लरका के गेडरा दइके उके छंडाय लेबे, अगर तै उके नेहको छंडइहे, ता ओखर नटेरी टोर दइहे, पय मनसे के सगलू पहिलउठा टोरवा छंडाय जही। 14जब भभिस्य हे तोर टोरवा तोर लग पूंछी, “एखर काहिन मतलब हबै?” तब तै ओखर लग कहबे “परभु अपन सकति लग हमके मिस्र देस लग, गुलामी के घर लग बाहिर निकाड लाय रथै। 15जब फिरोन कठोर हुइके हमके नेहको जाय दिहिस, तब परभु मिस्र देस के सगलू पहिलउठा के, मनसेन अउ पसुन के पहिलउठा के मार डारे रथै, इहैनिता मै सगलू डउका पहिलउठा परभु के चढाथों, पय मै अपन पहिलउठा टोरवा के खरीद के वापिस लइ लेथों।” 16हइ नियाव तोर हाथ हे अक्ठी निसानी या तोर दुनो आंखी कर बीच टीका बनी, काखे परभु सक्तिसाली हाथ लग हमके मिस्र देस लग बाहिर निकाडे रथै।

बादर अउ आगी कर खम्भा

17फिरोन इस्राएलिन के जाय देथै, भगवान उनके पलिस्ती देस के गली लग नेहको लइ गइस, मगर ऊ नेरे रथै, भगवान कथै, असना झइ होय कि जब उन युध्द देखही, ता पछतायके मिस्र देस लउट आमै। 18इहैनिता भगवान घुमाय फिराय के रतेहली परदेस के गली लग ललका समुन्दर के पल्ला लइ गइस, इस्राएली मिस्र देस लग लडाई के निता हथियारन लग भरे रथै। 19मूसा अपन संग यूसुफ के हाडा लइस, काखे यूसुफ इस्राएलिन लग हइ किरिया खाय रथै, जब भगवान तुम्हर सुधि लेही, तब अपन संग मोर हाडन के इहां लग जरूर लइ जाबे।3 20उन सुक्कोत सहर लग आगू बढै अउ उन रतेहली परदेस के छोर हे स्थित एताम नगर हे तम्बू डालिन। 21परभु रोज हे उनही गली दिखामै के निता बादर के खम्भा अउ रात हे उनके उजियार देय के निता आगी के खम्भा हे हुइके उनखर आगू-आगू चलथै, जेखर लग उन रात दिना यातरा कर सकै। 22दिन हे बादर कर खम्भा अउ रात हे आगी कर खम्भा इस्राएलिन के आगू लग नेहको टरथै।