निरगमन 12

फसह के तेउहार

1फेर यहोबा मिस्र देस हे मूसा अउ हारून लग कथै, 2हइ महिना तुम्हर निता सगलू महिना हे पहिले माने जही, तुम हइ महिना के साल के महिना हे पहिले मानिहा, 3तुम सगलू इस्राएली समूह लग हइ कइहा, कि हइ महिना के दसमा रोज सगलू मनसे अपन सियानन के परवार के जसना अक-अक्ठी गेडरा चुन लइहा, 4अउ कउ परवार गेडरा के गोस खाय के निता कम होय, ता ऊ अउ ओखर लिघ्घो के परोसी अपन-अपन परिवार के सदस्य के गिनती के जसना गेडरा लइ, तुम हर मनसे के खाय के सक्ति के जसना गेडरा के गोस के हिसाब रखिहा। 5तुम्हर गेडरा निरदोस नर अउ अक साल कर होय चाही, तुम उके गेडरा अउ छेडी के झुन्ड लग लइहा। 6तुम उके हइ महिना के चउदा रोज तक जिन्दा रखिहा, ऊ रोज सांझ के टेम इस्राएली समूह के सगलू मनसे बलि चढइहीं। 7इन पसुन के खून तोके अकजुट करै चाही, कुछ खून उन घरन के केवाड के चउखट के उप्पर अउ दुनो पल्ला हे लगामै चाही जउन घर हे मनसे हइ खाना खाय। 8उन उहै रात गेडरा के गोस आगी हे भूंजके खइहिन, उन गोस के अखमीरी रोटी अउ करू सबजी के संग खइहिन। 9गेडरा के गोस के कच्चा अउ पानी हे चुरायके झइ खाबे, पय मूंड गोड अउ आंती सहित ओही आगी हे भूंजके खाबे। 10तुम ओखर मसे कुछु सुबेन्ने तक नेहको छंडिहा, अगर कुछ गोस सुबेन्ने तक रहि जही, ता उके आगी हे जराय दइहा। 11तुम उके असना नियम हे खइहा, अपन कनिहा बांधे गोड हे बूट परिहे अउ हाथ हे डन्डा लइके तुम गोस के हरबी खाबे, हइ परभु के तेउहार हबै। 12मै ऊ रात मिस्र देस हे हुइके जहुं, अउ सगलू देस के मनसेन अउ पसुन के पहिलउठा के मारहुं, मै मिस्र देस के सगलू देउतन के सजा देहूं, मै परभु हव। 13जउन घर हे तुम रथा, उनखर हे लगाय हर खून तुम्हर निता अक्ठी निसानी होही, जब मै उस खून के देखहूं तब आगू बढ जहुं, जब मै मिस्र देस के मारहुं, तब तुमही नस्ट करै के निता तुम्हर उप्पर समस्या के आक्रमन नेहको होही।1 14हइ रोज तुम्हर निता अक्ठी सुरता कर रोज होही, तुम इके परभु के निता तेउहार के रूप हे बनाबे, तुम इके पुरखा लग पुरखा तक सब रोज के नियम जानके तेउहार बनइहा।

अखमीरी रोटी कर तेउहार

15तुम सात रोज तक अखमीरी रोटी खइहा, तुम पहिलेन रोज अपन-अपन घरन लग खमीर दुरिहा करिहा, काखे जउन मनसे पहिले रोज लग सतमा रोज तक खमीर चीज खाही, ऊ इस्राएली बिरादरी मसे नस्ट करे जही। 16तुम पहिलेन रोज अउ सतमा रोज पवितर समूह बुलाबे, हइ दुनो रोज हे कउनो काम नेहको करे जाय, सगलू मनसे के निता जउन खाना चाही, बलुक ओही तुम चुरा सकथा। 17तुम बिना खमीर रोटी के तेउहार के मनिहा, हइ रोज मै तुमही दल बल सहित मिस्र देस लग बाहिर निकाड लय हव, इहैनिता तुम पुरखा लग पुरखा नियम के रूप हे हइ रोज के मनिहा। 18तुम पहिले महिना के चउदा रोज के सांझ लग इक्कीस रोज के सांझ तक बिना खमीर के रोटी खाबे। 19सात रोज तक तुम्हर घरन हे खमीर चीज नेहको पाय जही, काखे खमीर के खाय बाले सगलू मनसे चाहे उन पराय देस के होय, या अपन देस के, इस्राएली समूह मसे नास करे जही। 20तुम कउनो चीज झइ खइहा, तुम अपन रहै बाले जिघा हे बिगर खमीर रोटी खाबे।

पहिला फसह कर तेउहार

21मूसा इस्राएलिन के सगलू सियानन के बुलायके उनखर लग कथै, तुम अपन-अपन परवार के जसना गेडरा चुना अउ फसह के तेउहार के गेडरा के बलि करा। 22तुम जूफा कर अक्ठी गुच्छा लेया, अउ उके तसला हे भरे हर खून हे बुडोय के हरबी तसला के खून के दूरा के चउखट के उप्पर अउ दुनो पल्ला लगाबा, कउनो मनसे सुबेन्ने होय तक अपन घर के दूरा के बाहिर झइ निकडै। 23काखे परभु मिस्र के रहैबाले के मारै के निता उहां लग हुइके जही, जब दुनो पल्ला खून दिखी, तब दूरा लग आगू बढ जही, ऊ नास करै बाले महामारी लग तुमही मारै के निता घर के भित्तर नेहको जाय देही।2 24तुम अउ तुम्हर वंस के निता सबरोज के नियम जानके माने करा। 25जब तुम ऊ देस छो पहुंचिहा, जेही परभु अपन बचन के जसना तुमके देही, तब तुम इहै नियम के मनिहा। 26जब तुम्हर लरका तुम्हर लग पूंछही, “हइ नियम के तुम्हर काहिन मतलब हबै?” 27तब तुम कइहा, “हइ परभु के तेउहार के बलि हबै, काखे परभु मिस्र देस हे इस्राएलिन के घर के छांडके आगू बढ गय रथै, परभु मिस्र के रहैबालेन के मारे रथै, पय ऊ हमर घर के छांड दय रथै,” इस्राएली मूंड झुकायके दंडवत करिन। 28तब जायके असना गुठेमै लगिन जउन आदेस परभु मूसा अउ हारून के दइस, उहै के जसना इस्राएली करथै।

जेठ टोरवा कर मिरतू

29परभु रात हे गद्दी हे बइठे फिरोन के जेठ टोरवा लग लइके कारागार हे पडे हर गुलामी के जेठ टोरवा अउ पसु के पहिले लरका, मिस्र देस हे जेठ लरका के मार डालिस।3 30फिरोन ओखर हरवाह अउ सगलू मिस्र के रहैबाले रात हे उठिन, सगलू देस हे हल्ला मचे रथै, एकोठे घर असना नेहको रथै, जिहां कउनोन के मिरतू नेहको हुइस। 31फिरोन रात के मूसा अउ हारून के बुलाइस अउ उनखर लग कथै, उठा, तुम अउ इस्राएली मोर बिरादरी के बीच लग निकर जा, जसना तुम गुठे हबा, अपन परभु के सेबा करा। 32जसना तुम कथा, अपन गेडरा छेडी गाय बइला लइ जा, अउ तुम मोके आसीस देया। 33मिस्र के रहैबाले इस्राएलिन हे दबाव डालै लगिस, जेखर लग उनही देस लग हरबी बाहिर करे जाय सकै, मिस्र के रहैबाले कथै, हम सगलू मर जाबे। 34इस्राएली अपन माडे हर पिसान के मिलाय लग आगू परांत के बरतन समेत चादर हे बांधके अपन खांधा हे डाल लइस। 35जसना मूसा उनखर लग कहे रथै, उन मिस्र के इस्राएलिन लग सोन चांदी के गहना अउ बन्डी मांग लइन। 36परभु इस्राएलिन के मिस्र देस के रहैबालेन हे दया करथै, पय उन जउन मांगे रथै, मिस्र के रहैबाले उनके दइ देथै, इहैमेर उन मिस्र के रहैबालेन के लूट लइन।4

इस्राएली मिस्र देस के छांडिन

37इस्राएल के मनसे रामसेस लग सुक्कोत सहर छो गइन, डउकी अउ लरकन के छांडके पइदल चलै बाले डउका लगभग छय लाख रथै। 38उनखर संग कइनठे गैर इस्राएली मनसे जथै, गेडरा, छेडी, गाय अउ बइलन कर संग आने पसु गइन। 39काखे उन मिस्र लग असना जबरन निकाड दय गइन कि, मनसेन के रोटी हे खमीर डालै के टेम नेहको मिलथै, अउ उन अपन यातरा के निता कउनो खास भोजन नेहको बनाथै, इहैनिता उनके बिगेर खमीर के रोटी बनामै के पडिस। 40इस्राएल के मनसे मिस्र देस छो चार सव तीस साल तक रथै।5 41चार सव तीस साल के बाद, ठीक उहै रोज भगवान के सगलू सुपाही मिस्र देस लग निकड गइन। 42परभु के हइ असना रात हबै, जेहमा ऊ इस्रालिन के मिस्र देस लग निकारै के निता जगिस, इहैनिता हइ रात परभु के निता सगलू इस्राएली मनसे ऊ रात के हरमेसा सुरता रखहीं।

फसह के तेउहार कर नियम

43परभु मूसा अउ हारून लग कथै, हइ तेउहार के नियम हबै, कि कउनो परदेसी फसह तेउहार हे ओखर मसे झइ खाय। 44पय अगर कउ मनसे हरवाह के खरीदी, अउ अगर ओखर सुध्दीकरन करी, ता ऊ हरवाह उके खाय सकथै। 45पय परदेसी अउ मजदुरिहा ओहमा लग झइ खाय। 46“सगलू परवार के घर के भित्तर खाना खाय चाही, कउनो मनसे खाना घर के बाहिर नेहको लइ जाय चाही, बलि पसु के कउनो हाडा झइ टोरा।6 47सगलू इस्राएली मनसे हइ तेउहार के जरूर बनामै। 48अगर कउनो मनसे तुम्हर संग रथै, जउन इस्राएल के समूह के संग नेहको हबै, पय ऊ फसह के तेउहार हे सामिल होय चाहथै, ता ओखर सुध्दीकरन जरूर होय चाही, तब ऊ इस्राएल के नागरिक जसना होही, अउ ऊ खाना हे सामिल हुइ सकथै, अगर ऊ मनसे के सुध्दीकरन नेहको होय हबै, ता ऊ हइ फसह के तेउहार के खाना के नेहको खाय सकथै। 49हइ नियम सगलू झन हे लागू होही, चाहे ऊ मनसे तुम्हर देस के नागरिक हबै या परदेसी हबै।”7 50इहैनिता इस्राएल के सगलू मनसे उन आदेस के मानथै, जेही भगवान मूसा अउ हारून के दय रथै। 51अउ परभु ठीक उहै रोज इस्राएलिन के समूह समेत अतियाचार लग मिस्र देस लग बाहिर निकाड लाइस।