निरगमन 11

जेठ टोरवा कर मिरतू के चेतावनी

1फेर परभु मूसा लग कथै, मै अक्ठी अउ समस्या फिरोन अउ मिस्र हे लइहों, ओखर बाद ऊ तुमके इछो लग जाय देही, जब ऊ जाय देही, तब तुमके सगलू के इहां लग जरूर निकाड दइ। 2तै मोर मनसेन लग गुठेबे कि सगलू डउका अपन परोसिन लग सोना चांदी के बरतन मांग ले। 3तब परभु अपन मनसेन के मिस्र के रहैबाले के किरपा करे हबै, एतकै नेहको, ऊ मनसे मूसा मिस्र देस हे फिरोन के हरवाह अउ सगलू मनसेन के नजर हे बोहत बडा रथै। 4फेर मूसा फिरोन लग कथै, परभु कथै, मै आधा रात के मिस्र देस के बीच हे हुइके चलहुं। 5अउ मिस्र देस के सगलू पहिलउठा मर जइहिन, राज गद्दी हे बइठे बाले फिरोन के जेठ टोरवा के लइके चकिया पिसै बाले हरवाहिन के जेठ टोरवा तक, पसुन के सगलू पहिलउठा मर जइहिन। 6सगलू मिस्र देस हे बडा चिलइहिन, असना चिलइहिन न कबहुन हुइस, अउ न कबहुन होही। 7पय इस्राएलिन के परति, चाहे उन मनसे होय, या उनखर पसु कुकरा तक नेहको गुर्राही, जेखर लग तुमके सुरता होही, कि परभु मिस्र के रहैबाले अउ इस्राएलियन के बीच भेद करथै। 8हइ तोर सगलू हरवाह मोर लिघ्घो अइहिन, अउ मूंड झुकायके मोर सोगत करहीं, उन कइहीं, “किरपा अपन हरवाह के लइके कढ जा” महुं कढ जहुं, मूसा हरबी गुस्सा हे भरे हर फिरोन के लिघ्घो लग कढ गइस। 9परभु मूसा लग कथै, “फिरोन तोर बात नेहको सुनी जेखर लग मै मिस्र देस हे बोहत चकित के काम करों।” 10मूसा अउ हारून फिरोन के आगू हइ चकित के काम करिस, पय परभु फिरोन के हिरदय कठोर कर दइस, अउ ऊ मिस्र देस लग इस्राएलिन के नेहको जाय दइस।