निरगमन 10

चिड्डा के हमला

1परभु मूसा लग कथै, फिरोन के लिघ्घो जा, मै उके अउ ओखर हरवाहन के हिरदय कठोर कर दय हबो, कि उनखर बीच हे अपन हइ निसानी दिखाहुं। 2अउ तै अपन टोरवा नाती लग वरनन कर सका, कि मै मिस्रियन के कसना मूरुख बनायों अउ उनखर बीच केतका चिन्ह दिखायों कि जेखर लग तुमही पता हुइ जाय कि मै परभु हव। 3मूसा अउ हारून अउ फिरोन के लिघ्घो गइन, उन ओखर लग कथै, इब्रिन के परभु भगवान कथै, “तै कब तक मोर अधीन होय लग मना करबे? मोर मनसेन के जाय दे कि उन मोर सेबा करै। 4अगर तै मनसेन के नेहको जाय दइहे, ता देख कल मै तोर देस हे चिड्डा के समूह लग हमला कराहुं। 5चिड्डा भुंइ के सतह के असना ढक लइ कि ऊ कउनो के दिखाई नेहको देही, जउन ओर के बरसा लग बच गय हबै, ओही उन खाय लइहिन, उन तुम्हर खेतवा के सगलू रूख के खाय लइहिन। 6उन तोर घर हे तोर हरवाहन अउ मिस्र के रहैबालेन के सगलू घरन हे भर जइहिन, एतका चिड्डा तोर बाफ दादा तोर पुरखा अपन पइदा लग आज तक नेहको देखे हुइहिन” तब मूसा फिरोन के लिघ्घो लग लउटके बाहिर छो कढ गइस। 7फिरोन के हरवाह ओखर लग कथै, कब तक हइ मनसे हमर निता फन्दा बने रही? इस्राएलिन के जाय दे कि उन अपन परभु भगवान के सेबा करै, का तै अभिन्नो तक नेहको जानथस, कि मिस्र देस नास हुइ गय हबै। 8तब मूसा अउ हारून फिरोन के लिघ्घो फेरै बुलाय गइस, फिरोन उनखर लग कथै, जा, अपन परभु भगवान के सेबा करा, पय जाय बाले मनसे कोन-कोन हबै? 9मूसा कथै, हम लरका बच्चा अउ डोकरा सहित जइहिन, हम अपन टोरवा-टोरिया गेडरा छेडी, गाय गोरु के लइके जइहिन, काखे हमके परभु के निता तेउहार बनामै के हबै। 10फिरोन ओखर लग कथै, अगर मै तुमके अउ तुम्हर लरकन के जाय देहुं, “ता परभु तुम्हर संग होय, पय देखा तुम्हर मन हे बुराई दिखथै। 11नेहको अगर तुम इहै चाहथा, ता सिबाय डउका जायके परभु कर आराधना कर सकथै।” हइ कहिके, मूसा अउ हारून के राजा कर आगू लग बाहिर निकाड दय गइस। 12परभु मूसा लग कथै, मिस्र देस के पल्ला अपन हाथ उठा कि चिड्डा के दल मिस्र देस हे हमला करै अउ देस के सगलू रूख के उखेल दे, जउन ओर के बरसा लग बच गय हबै। 13जब मूसा मिस्र देस के पल्ला अपन डन्डा उठाथै, तब परभु सगलू देस हे पूरे दिन अउ रात भर पुरवइया हवा के बहाइस, जब सुबेन्ने हुइस, तब पूरबी हवा अपन संग चिड्डा के दल लइ आनथै। 14चिड्डा के दल सगलू मिस्र देस हे टूट पडिस, चिड्डा सगलू देस हे बगर गइन, चिड्डा के दल एतका बडा रथै, जेतका एखर लग पहिले कबहुंन नेहको देखे गइस अउ न कबहुन एखर बाद देखे जही। 15चिड्डा भुंइ के असना ढक लइन कि सगलू देस हे अंधियार छाय गइस, उन देस के सगलू रूख कर डगइल अउ फडुहा के, जउन ओर के बरसा लग बच गय रथै, खाय लइन, सगलू मिस्र देस हे कउनो हरियर चीज नेहको बचिस, न खेतवा के पउधा अउ न रूख। 16फिरोन हरबी मूसा अउ हारून के बुलाइस अउ उनखर लग कथै, मै तुम्हर भगवान परभु के परति अउ तुम्हर परति पाप करे हबै। 17अबकी बेर मोर पाप छमा करा, अउ अपन परभु भगवान लग बिनती करा, कि ऊ मोर लग हइ मिरतू संकट के दुरिहा करै। 18मूसा फिरोन के लिघ्घो लग बाहिर गइस, ऊ परभु लग बिनती करिस। 19तब परभु खूब पस्चिम हवा चलाइस, ऊ चिड्डन के उडाय लइ गइस, अउ उनही ललका समुन्दर हे बुडाय दइस, सगलू मिस्र देस हे अक्कोठे चिड्डा नेहको रथै। 20पय परभु फिरोन के हिरदय कठोर कर दइस, ऊ इस्राएलिन के नेहको जाय दइस।

नउमा समस्या अंधियार

21परभु मूसा लग कथै, अपन हाथ बादर के पल्ला उठा, जेखर लग मिस्र देस हे अंधियार छाय जाय, असना अंधियार होय जेखर लग टमडत जाय। 22पय मूसा अपन हाथ बादर के पल्ला उठाइस, तउन तीन रोज तक सगलू मिस्र देस छो घोर अंधियार छाय गइस।1 23मिस्र देस के रहैबाले एक दूसर के नेहको देख सकथै, उन तीन रोज तक अपन जिघा लग उठ नेहको सकिन पय इस्राएलियन के रहैबाले जिघा हे उजियार रथै। 24फिरोन मूसा के बुलाइस, अउ ओखर लग कथै, जा, अपन यहोबा कर सेबा करा, तुम्हर लरका बच्चा तुम्हर संग जाय सकथै, बलुक अपन गेडरा छेडी अउ गाय गोरु के छांड जा। 25मूसा कथै, तोके हमके बलि अउ आगी बलि के निता पसु देय चाही, जेखर लग हम अपन परभु भगवान के निता बलि चढाय सकी। 26हमर पसु हमर संग जरूर जही, अक्कोठे पसु नेहको छांडे जही, हम अपन परभु भगवान के सेबा के निता उनही अपन संग लइ जाबे, जब तक हम उहां नेहको पहुंच जउब, तब तक नेहको जानथन कि हम अपन परभु भगवान के सेबा कसना करब। 27पय परभु फिरोन के हिरदय के कठोर कर दइस, जेखर लग ऊ इस्राएलियन के नेहको जाय दइस। 28फिरोन मूसा लग कथै, “मोर लिघ्घो लग कढ जा, तुम सचेत रइहा, मोर मुंह फेर झइ देखिहा, काखे जउन रोज तै मोर सकल देखिहा, उहै रोज मर जइहा।” 29मूसा कथै, “तै सही कथस, मै तोर सकल के कबहुन नेहको देखिहों।”