Bhilali Bible
भजन सहीता 99
भगवान आखा सी मटु राजु छे
यहोवा भगवान आखी कळी पर राज कर रयु,
माणसे थुर-थुर कापणे बाजी ज्या।
चु ते, करुब नावेन सरगेवाळा चाकर्या पर बसीन राज कर रयु,
हेरसी आखा देसेन माणसेम धाक भराय जाणु चाहजे!1
सीयोन सहर मां यहोवा भगवानेन मटु छे।
चु ते आखाम उचे रयन आखा देसेन माणसे पर राज कर रयु;
हेरसी चे बी, तेरा जुगाळा ने धाकभर्या नावेन बड़ाय करनु चाहजे।
तेरो नाव छाचलीन चुखलो छे।
यहोवा भगवानेन राजान ताकुत जुरभरी छे, तीनाक ते नीयाव वारु गमे,
हेरसी चु खराय्न पायु काठु करलु छे।
चु याकुबेन घराणा मां, नीयाव ने धरम, कामे लावलु छे।
आपणा मालीक भगवानेन भक्ती करने,
तेरा पाय मेलनेन पयड़ी भीणी मांडा टेकु,
ने तेरी बड़ाय करु, चु ते चुखलु छे।
मुसा ने हारुन तेरा पुजारा माय्न हतला;
ने समुएल, तेरे वाटे दुवा करने वाळा माय्न हतलु।
जे ते मालीक वाटे दुवा करतेला, ने चु हींद्री सामळीन जपाप आपतेलु।
चु वादळान खाम्बा मां सी हींद्रे धड़े वात करतेलु,
ने जे तेरा हुकुम मानतेला ने तेरा आपला नेम-कायदान अनसारे जीवतेला।2
आपणु मालीक भगवान हींद्री सामळीन जपाप आपतेलु;
चु आपणा आड़ा-बुड़ाक सुदारने करीन तींद्रा कुहर्या कामेन डंड ते आपतेलु,
बाकुन तीनुक माफी बी आपतेलु।
आपणा यहोवा भगवानेन भक्ती करने,
तेरा चुखला बयड़ा पर मांडा टेकु, ने तेरी बड़ाय करु;
काहाकी यहोवा जु आपणु भगवान छे, चु चुखलु छे।
Source notes (2)
- Cross-reference नीरगमन 25:22
- Cross-reference नीरगमन 33:9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.