Bhilali Bible
भजन सहीता 98
भगवान कळीन राजु छे
भजन
यहोवा भगवान वाटे एक नवलो गीत गावु,
काहाकी चु ते छेलभात्या काम करलु छे।
चु आपसा जेवड़्या हातेन ने चुखला ताकुतेन साहरे,
छुटकारु ने जीत हात करलु छे।
यहोवा भगवान आड़-जात्या माणसेन देखेता,
छुटकारान ने जीतेन कामेन साहरे आपसु धरम उजेंतु करलु छे।
चु हेर करीन ईस्रायलीन घराणा पर,
आपसी दया ने परम ने खराय देखाड़लु छे। धरतीन खुणे-कुपरे वाळा माणसे,
आपणा भगवानेन जीत ने छुटकारु देखला छे।
ए धरतीन आखा माणसे, यहोवा भगवानेन जीतेन गीत गावु!
खुस हय्न जीतीन गीत गावु, ने भजन गावु!
झुणगु वाजाड़ी-वाजाड़ीन, भगवानेन भजन गावु;
झुणगान सुवांगे-सुवांगे, यहोवा भगवानेन गुण गावु।
फेप्या ने सींगो वाजाड़ीन भगवान अगळ,
जु राजु छे, तेरा जीतेन गीत गावु।
समुदर ने तेरेमां रवणी आखी चीज कळीण,
ने अळी तेरेमां रवण्या आखा खुसीन गीते गावणु चाहजे।
आखा नद्या थापड़्या वाजाड़नु चाहजे;
आखा बयड़ा भेळा हय्न जीतेन गीत गावणु चाहजे।
जो आखो यहोवा भगवानेन हजरी मां हवणु चाहजे;
काहाकी चु आखी कळीन माणसेन नीयाव करने करीन आवणे बाजी रयु।
चु धरमेन साहरे आखी कळीन माणसेन नीयाव करसे, छाचलीन चु आखा देसेन माणसेन नीयाव करसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.