Bhilali Bible
भजन सहीता 97
भगवान आखाम सी उचु राज-करन्यु
यहोवा भगवान आखी कळी पर राज कर रयु,
धरती ने आखो काळा-पाणी खुस हवणु चाहजे।
आदळा ने आंधारलो यहोवा भगवानेन च्यारे-मेर छावाय रयो;
धरम ने नीयाव, तेरी राजगादीन पायु छे।
तेरे अगळ-अगळ आक्ठो जाय;
ने च्यारे-मेर तेरा वेरीक बाळीन भसम करे।
तेरी ईजळी आखी कळ काजे वीजाळो कर देय,
धरती ईजळीक देखीन कापणे बाजी जाय।
यहोवा भगवान अगळ, आखी धरतीन मालीक अगळ,
बयड़ा मोमबत्तीन तसा पीगेळने बाजी जाय।
आखो सरग तेरा धरमेक उजेंतो करीन देखाड़े,
ने आखा देसेन आखा माणसे, तेरु सेक-सींगार देखे।
जतरी बी फालतु मुरतीन पुजा करे, ने मुरत्या पर मटाय करे, चे आखा लाजवायणु चाहजे;
ए आखा देवी-देवता, यहोवा भगवान अगळ मांडा टेकीन आंदु।
सीयोन सहरेन माणसे तारी नीयावेन वात सामळीन खुस हवे;
ए यहोवा भगवान, यहुदा सहरेन आखी पुरे खुस हंय रय।
काहाकी ए यहोवा भगवान, आखी धरती पर आखाम उचे रवण्यु तुत छे;
तु आखा देवी-देवता सी बेसकु जुरभर्यु छे।
ए आखा, यहोवा भगवान काजे परम करन्या,
तुहुंं पाप भीणी रीस करु। चु ते आपसा खरला भगतेन जीवेन गुवाळी करे,
ने तीनुक जम माणसेन हातेम सी छुड़ावे।
तेरो वीजाळो धरमी माणसे पर भीबळे।
ने चु सुद्ला माणसे वाटे खुसी वेरे।
ए धरमी माणसे,
यहोवा भगवान मां खुस रवु;
ने तेरो चुखलो नाव हेर करीन,
तीनाक बेसकु वारु कवु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.