Bhilali Bible
भजन सहीता 96
भगवान आखा मां सी उचु राजु
(1 ईतीहास 16:23-33)
ए धरतीन आखा माणसे, यहोवा भगवान वाटे एक गीत गावु;
यहोवा भगवान वाटे एक नवलो गीत गावु।
यहोवा भगवान वाटे गीत गावु, तेर नावेक वारु कवु;
दाहड़ीन तेरा छुटकारान खुस-खबर सामळावता रवु।
आखा राज्येन ईचमां यहोवान सेक-सींगारेन वात देखाड़ु,
आखा देसेन माणसे काजे भगवानेन छेल भात्या कामेन वात देखाड़ु।
काहाकी यहोवा भगवान ते जुरभर्यु ने बेसकु बड़ाय करे असु छे;
चु देवता कवायण्या आखा सी वदु बीहाणो माने असु छे।
काहाकी देस-देसेन आखा देवता ते मुरतीत छे;
बाकुन यहोवा भगवान आखी सरग मंडळी बणावलु छे।
चु जुर भर्यु ने सेक भर्यु छे;
हेरसी तेरु चुखलु मंदीर बी तेरा तेरे जुरे ने सेक सी सींगारलु छे।
ए आखा राजेन माणसे, कुळी डीट,
यहोवा भगवानेन गुणे गावु, यहोवा भगवानेन सेक-सींगार ने ताकत काजे मानु।
यहोवा भगवानेन, तेरा नावेन अनसारे गुण गावु;
भेट लीन तेरा आंगणा मां आवु।
ए धरतीन आखा माणसे, तेरे अगळ बीहता जाय्न तेरी भक्ती करु।
ने हेरे अगळ मांडा टेकीन आंदु।1
आखा राज्येन माणसेक कवु “यहोवा भगवान आखी कळी पर राज करे;
हेरसी धरती हाले पाखुर टेक रय।
चु देस-देसेन माणसेन खरलु नीयाव करसे।”
आखी सरग मंडळी खुस हवणु चाहजे, ने धरती बी खुस हवणु चाहजे,
ने समुदर ने जो कांय तेरेम छे, चो आखो खुस हवणु चाहजे;
धरतीन आखा खेते ने तींद्रेम पाकणी आखी मेर बेसकी खुस हवणु चाहजे;
तत्यार बयड़ान आखा झाड़का खुस हय्न सुसेवणु चाहजे।
ज्य आखो यहोवा भगवानेन हजरी मां हवणु चाहजे, काहाकी चु आवणे बाजी र्यु,
चु आखी कळीन माणसेन नीयाव करने करीन आवणे बाजी र्यु। चु धरमेन साहरे आखी कळीन माणसेन नीयाव करसे,
छाचायन साहरे आखा देसेन माणसेन नीयाव करसे।
Source notes (1)
- Cross-reference भजन सहीता 29:1,2
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.