Bhilali Bible
भजन सहीता 95
भगवानेन बड़ाय करनेन गीत
आवु, आपणु छुटकारु आपण्या यहोवा भगवान वाटे खुस हय्न गावजे,
जु एक चापर्यान तसु आपणे आडु आवे, तेरा गुणे जुरसी गावजे।
आवु, यहोवा भगवान काजे बेसकु वारु कवता जाय्न तेरे अगळ आवजे,
ने भजन गावता जाय्न तेरी बड़ाय करजे।
काहाकी यहोवा भगवान ताकत वाळु छे,
ने आखा देवता सी बी बेसकु ताकत वाळु राजु छे।
धरतीन उंडो लग तेरात हकेम छे;
ने बयड़ान चट्या बी तेरात छे।
समुदर तेरोत छे, काहाकी तीनाक हयुत उबजाड़लु छे,
चु, आपसुत धरतीक उबजाड़लु छे।
आवु, आपणु, ढंगा वळीन भगवानेन भक्ती करजे।
आपणुक घड़न्याक यहोवा भगवान काजे बेसकु वारु कवजे।
काहाकी चु आपणु भगवान छे,
ने आपणु तेरा असामी छे, आपणु,
तेरा हातेन गाडरा छे,
वारु रवतो की आज तुहुंं हेरी वात सामळता।
आपणी-आपणी छाती असी काठी मां करु,
जसा मरीबा मां, नीते मस्सान दाहड़े जंगल मां हवलो हतलो,1
तीनी टेमे तुंद्रा आड़ा-बुड़ा मेसेक पारख्या,
ने चे मारा वारु कामेक देखीन बी मेसेक पारख्या।2
चाळीस साल लक मे तीनी पीड़ीन माणसे सी रीसयान रयु, ने मे असु कवलु,
जे ते मारी वाट उळखीन बी, मारे वाट्ये नी चाल्या;
हीनु माणसेन भटकण्या मन छे।
हेरसी मे मारी रीस मां सगुन खायन कवलु,
छाचलीन जे मारा आरामेन जागा मां,
नी भराय सके।3
Source notes (3)
- Cross-reference ईब्रानीयो 3:15; 4:7
- Cross-reference नीरगमन 17:1-7; गिन्ती 20:2-13
- Cross-reference गिन्ती 14:20-23; वेवस्थावीवरन 1:34-36; 12:9,10; ईब्रानीयो 4:3-5; 3:7-11
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.