भजन सहीता 95:1

भगवानेन बड़ाय करनेन गीत

1आवु, आपणु छुटकारु आपण्‌या यहोवा भगवान वाटे खुस हय्‌न गावजे,

जु एक चापर्‌यान तसु आपणे आडु आवे, तेरा गुणे जुरसी गावजे।

2आवु, यहोवा भगवान काजे बेसकु वारु कवता जाय्‌न तेरे अगळ आवजे,

ने भजन गावता जाय्‌न तेरी बड़ाय करजे।

3काहाकी यहोवा भगवान ताकत वाळु छे,

ने आखा देवता सी बी बेसकु ताकत वाळु राजु छे।

4धरतीन उंडो लग तेरात हकेम छे;

ने बयड़ान चट्‌या बी तेरात छे।

5समुदर तेरोत छे, काहाकी तीनाक हयुत उबजाड़लु छे,

चु, आपसुत धरतीक उबजाड़लु छे।

6आवु, आपणु, ढंगा वळीन भगवानेन भक्‌ती करजे।

आपणुक घड़न्‌याक यहोवा भगवान काजे बेसकु वारु कवजे।

7काहाकी चु आपणु भगवान छे,

ने आपणु तेरा असामी छे, आपणु,

तेरा हातेन गाडरा छे,

वारु रवतो की आज तुहुंं हेरी वात सामळता।

8आपणी-आपणी छाती असी काठी मां करु,

जसा मरीबा मां, नीते मस्‌सान दाहड़े जंगल मां हवलो हतलो,1

9तीनी टेमे तुंद्‌रा आड़ा-बुड़ा मेसेक पारख्‌या,

ने चे मारा वारु कामेक देखीन बी मेसेक पारख्‌या।2

10चाळीस साल लक मे तीनी पीड़ीन माणसे सी रीसयान रयु, ने मे असु कवलु,

जे ते मारी वाट उळखीन बी, मारे वाट्‌ये नी चाल्‌या;

हीनु माणसेन भटकण्‌या मन छे।

11हेरसी मे मारी रीस मां सगुन खायन कवलु,

छाचलीन जे मारा आरामेन जागा मां,

नी भराय सके।3