Bhilali Bible
भजन सहीता 92
खुसीन एक गीत
आरामेन दाहड़े गावणे वाटे एक मीसमर भजन
ए यहोवा भगवान, तुसेक बेसकु वारु कवणु वारु छे;
ए आखाम उचे रवण्या, तारा नावेन गुण गावणु ते बेसको वारु छे।
संदारे-संदारे तारी दया,
ने राते-राते, तारी खराय्न परचार करनु बेसको वारु छे;
दस तार वाळो वाजो ने रमथु वाजाड़ीन,
ने झुणगान नांदे भेळे तारा गुणे गावणु भलो छे।
ए यहोवा भगवान, मार वाटे करला कामेन साहरे तु मेसेक खुस कर देदलु छे;
हेरेसी मे तार हाते करला छेल-भात्या काम वाटे खुसीन गीते गावीस।
ए यहोवा भगवान, तारा काम बेसका वारु छे!
ने तारा वीच्यार ते छेव नी लेवाये असा छे!
ढुरे सारकु माणुस, जी वात नी समजे।
डेड़-अकल्या माणसे ईनी वात पर वीच्यार नी करे:
की वेरी ने कुहर्या माणसे चारान तसा
छाटात पुसाये ते खरा,
बाकुन चे आखा जलमकात सर जासे।
बाकुन ए यहोवा भगवान, तु ते जलम आखाम उचे रय्न राज करन्यु छे।
देख! ए यहोवा भगवान, तारा वेरी, तारी वीरुद करन्या रावण्या-तीवण्या हवता जाय रया;
छाचलीन कुहराय करन्या आखा माणसे सर जासे।
बाकुन तु, जंगली सांड्यान सींगड़ा मुजुक मारो मुणको उचो करलु छे;
तु मार पर ताब्लो तेल रेवचीन मेसेक नेवाड़ लेदलु छे।
मे मारा वेरीक सरतेला देख लेदलु छे;
मारी वीरुद करन्यान बरबादी सामळी लेदलु छे।
धरमी माणसे खजुरेन तसा वारु पुसायसे।
ने लबानोन बयड़ाम वदण्या देवदारेन झाड़कान तसा काठा हंय जासे।
धरमी माणसे यहोवा भगवानेन मंदीर मां,
भगवानेन आंगणा मां चुपला झाड़कान तसा छे, फलो-फलो करे।
जसो झाड़को डाहवो हय्न बी वारु फळीन भलाय करे,
तसात धरमी माणसे डाहवारा मां बी काठा रय्न भलाय करता रवसे।
जेरेसी ज उजेंतो हवे की यहोवा भगवान खरलु छे;
तेरेमां कांय बी खुड़ नी हय, चु चापर्यान तसु छे, चु ते मारी वारु राखवाळी करे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.