भजन सहीता 91

भगवान हामरु राखवाळ्‌यु छे

1जु कुय आखा मां उचे रवण्‌यु भगवानेन आसरे रयु,

चु भगवानेन साहळे बेफीकर्‌यु रवसे।

2हेरसी मे, यहोवा भगवान काजे कवो,

तु मारु आसरु छे; तु मार वाटे कीलान अवारकुट सारकु छे;

तुत मारु भगवान छे, मे तारेत पर भुरसु करो।

3तुसेक बी बरबादीन जाळ मां सी जलम बचाड़से,

ने जीव लेण्‌या मटला रुग्‌टा सी छेटु राखसे।

4चु तुसेक, कुकड़ीन तसु, आपसा पाखड़ा तळे ढाक लेसे,

ने तु तेरेन्‌चां साताय्‌न बच जासी। भगवानेन खरला वायदा तार वाटे ढाळ छे।

5तु राते बीहाड़न्‌या चीजेक नी बीहे,

ने दीसु उडीन आवण्‌य बीलखा सी बी, नी बीहे,

6तु भर राती आवण्‌या रुगटा सी नी बीहे, ने माथेक दाहड़े आवण्‌या मटला रुगटा सी बी, नी बीहे;

जु आखा माणसे काजे सार देय।

7तारे देखेता हजारु माणसे हीट पड़से।

भले, तारे च्‌यारे-मेर दस हजार माणसे मरसे;

तेबी चु रुग तारेन्‌चा नी आवे।

8बाकुन, तु कुहर्‌या माणसे काजे,

पापेन डंड भुगतेला डुळे देखसी।

9मारु आसरु ते आखा मां उचे रवण्‌यु यहोवा भगवानुत छे;

तु बी तीना भगवान काजे आपसु आसरु मान लेदु,

10हेरसी काहनी बी गरा तारे पर नी आवे,

ने काहना बी हीड़ा-पीड़ान डंड, तारे घर धड़े नी आवे।

11भगवान तारी राखवाळी करने वाटे आपसा सरगेवाळा चाकर्‌या काजे हुकुम आपसे;

ने तु तेरा कह्‌या मां कांखुर बी जासी ती, चे तारी राखवाळी करसे।1

12चे तुसेक उपरुत झेल लेसे,

ने तारे पाये, दगड़ान ठेसु लागणे नी देय।2

13तु ते नाहार काजे ने घड़साक पायो तळे रंदळी देसी,

तु जुवान नाहार काजे ने अजगर काजे कुचरी देसी।3

14भगवान कवे, “तु मेसेक परम करलु छे, हेरसी मे तुसेक छुड़ाय्‌स,

तु मारो नाव जाण लेदलु छे, हेरसी मे तारी राखवाळी करीस।

15जत्‌यार तु दुवा करसी, तत्‌यार मे सामळी लीस।

जत्‌यार तु गराम पड़सी, तत्‌यार मे तारे साते रय्‌स;

मे तुसेक बचाड़ीन तारी ईज्‌जत करीस।

16मे तुसेक बेसका दाहड़ा लग वारकु जीवाड़ीस,

ने मे तुसेक मारा छुटकारान ताकत देखाड़ीस।”