Bhilali Bible
भजन सहीता 93
भगवान राजु छे
यहोवा भगवान राजु बणीन आखी कळजुग पर राज कर रयु;
चु सेक-सींगारेन ने ताकतेन पुथल्या पेहेर रयु;
ने चु तीयार हय्न काठी कमर कस रयु;
हेरसी धरती हाले पाखुर टेक रय।
ए यहोवा भगवान, तु छेव नी लेवाय तीने टेम सी राजु छे;
तारी राजगादी ते जलम सी छे,
ए यहोवा भगवान, धरतीन मटला नद्या आवीन सुसवी रया,
ने घुगवारु दीन जाय रया।
समुदर ने दरीयान घुगवारान ने झलकेन ताकत वदु छे;
तेबी ए यहोवा भगवान, हींद्रे सी तारी ताकत वदु छे,
तु ते दरीया समुदर सी बेसके उपर बसीन राज कर रयु।
ए यहोवा भगवान, छाचलीन तारा गवा पुरावा भुरसु करे असा छे,
ए मालीक भगवान, तारा मंदीरेक चुखलु मंदीर कवणे,
जलम सुभा देय।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.