Bhilali Bible
भजन सहीता 87
यरुसलम सहरेन बड़ाय
कोरह अवल्यातेन लिखलो भजन, जो एक खास गीत बी छे।
हेरु नेवु चुखला बयड़ा मां छे;
याकुबेन अवल्यात वाटे रवणे करीन बेसका सहर छे,
बाकुन तेबी मालीक भगवान काजे सीयोन सहरुत वारु लागे।
ए सीयोन, ए भगवानेन सहर,
छाचलीन भगवान तारा सेक-सींगारेन बारामां बेसकी वारु वात कवलु छे।
चु असु कवलु छे, “मेसेक उळखीन मारी भक्ती-करन्या पुठ्ये मे,
रहब1 देसेन ने बेबीलोन देसेन माणसे काजे गीणीस।
मे तींद्रे पुठ्ये पलीस्ती देसेन, सोर देसेन ने कुस देसेन माणसे काजे बी गीणीस।
मे तीनुक असु कय्न गीणीस: ‘जे आखा सीयोन सहर मां पयदा हवला मारात असामी छे’।”
हेरसी माणसे सीयोन सहरेन बारामां असा कवसे:
आखा देसेन माणसे पयदा हय्न सीयोन सहरेन असामी बण गुयला छे।
ने आखा मां सी उचे रवण्यु भगवान तीना सहर काजे जलम टेकलु राखसे।
यहोवा भगवान, जाती-जाती मां सी नेवाड़ीन असु गीणीन लिखसे,
“फलाणु-फलाणु, सीयोन सहर मां पयदा हवलु मारु असामी छे।”
हेरसी चे आखान-आखा गावता ने नाच्ता जाय्न, सीयोन मां आय्न तीनाक असा कवसे,
“मारी जीवाय्न आखी बरकतेन झीर तारेत मां छे।”
Source notes (1)
- Footnote मीसर देस
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.