Bhilali Bible
भजन सहीता 88
मदत वाटे आयड़ो
कोरह अवल्यातेन भजन, जु एजरा कळी वाळा हेमानेन एक मसकील भजन बी छे। भजन-गावण्यान डाहला वाटे!
“माहलात लेआन्नोत” रेंग मां, गावजु। जो एक खास गीत बी छे।
ए मेसेक छुटकारु आपण्या यहोवा भगवान,
मे रात-दाहड़ु तारे अगळ लीलघाय करतु रवो।
मारी दुवा तुसेक सामळायतो नी काय?
मे ते आयड़ीन लीलघाया करो, मारी सामळी ते ले!
मारु जीव ते गरा मां पड़ रयु;
मे ते मर्युत-मर्यु हंय रयु।
मे ते कबर मां पड़लान तसु हंय गुयु, तेरेम ईतरुक बी जुर नी हय;
मसाण मां गाड़ला माणसेन तसु हंय गुयु।
मारी गीणती ते मरला माणसे मां हंय रय;
मे तीनु माणसेन तसु पड़ रयु, तीनुक मारीन मसाण मां गाड़ देय;
तीनुक तु हेर बी नी करे,
ने तींद्री मदत बी नी करे।
तु मेसेक मसाणेन गड्डा मां नाख देदु हय,
जसु आंदारला खुयारा मां नाख देदु हय।
तारी रीसेन भार मां मे डाबायलु छे, तारी रीस,
समुदरेन झलकेन तसी मेसेक डुबाड़ने बाजी गुयली।
तु मारा आखा दुसतीदार्या काजे मार धड़े सी छेटा कर देदु;
ने चे मारी हालत देखीन छीट राखे।
मे ते कुंडायलु छे, मेसेक बाहार बी नी नीकळाये;
ने दुख मां रड़ी-रड़ीन मेसेक धुंदळोस देखाये।
ए यहोवा भगवान, मे दाहड़ीत आयड़ीन दुवा करो,
मे दाहड़ीत तार भीणी हात फेलावीन लीलघाया करो।
ए मालीक भगवान, तु मरला वाटे चकराड़न्यो बेसको काम करे काय?
तु ते असु नी करतु ने मनार्या बी बठा हय्न तारा गुण नी गावता।
तारी दयान वात मसाण मां हवसे काय?
तु भुरसु करे असु छे असी वात पाताळेन गड्डा मां हवसे काय?
तारा चकराड़न्या काम आंदारली मुतेन कळ मां उजेंता हंय रया काय?
ने तारु धरम ईसरायण्या मरलान कळ मां कुय हेर कर रया काय? नी करता।
बाकुन ए यहोवा भगवान, मे ते हयं तारे भीणी दुवा करलु छे;
ने संदारे वेगीत मारी दुवा तारेन्चा पुग्या करसे, मारी मदत कर।
ए यहोवा भगवान, तु मेसेक काहा छुड़ रह्यु?
तु मारे भीणी सी आडु काहा भाळ रह्यु?
मे जुवान हतलु तीं सी आदु-मरलु ने दुखी छे,
तार साहरे अळी-अळीन वेला पाड़ाय्न मे बेसकु घाबराय गुयलु छे।
तारी रीसेन आच मारेन्चां माय्न जाय रय;
तारु धाक मेसेक सार वागलु छे।
चु धाक आखु दाहड़ु मेसेक पाणीन तसु घेरवी रह्यु;
ची रीस मेसेक च्यारे-मेर घेरवी रवे।
तु मारा लाटेकला दुस्तीदार काजे ने भाय-बेटाक बी, मारेन्चां सी छेटे कर देदु;
ने मारा उळखायता काजे आंधारला मां नाख देदु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.