Bhilali Bible
भजन सहीता 86
मदत करने वाटे दुवा
दावुदेन दुवा
ए यहोवा भगवान, मारी दुवा सामळीन मेसेक जपाप आप;
मे ते वेला पाड़ायलु ने बीन आसर्यु छे।
मारी जीवाय्न राखवाळी कर, काहाकी मे तारु भगत छे; तुत मारु भगवान छे,
ने मे तारु चाकर्यु छे, मे तारेत पर भुरसु करो; मेसेक बचाड़।
ए भगवान मालीक, मार पर दया कर,
काहाकी मे रात-दाहड़ु तारेत भीणी भाळ्या करो।
ए भगवान मालीक, मे ते तारु चाकर्यु छे;
मे मारो मन तारेत भीणी लागाड़ो, हेरसी मारो मन खुस कर।
काहाकी ए भगवान-मालीक, तु भलास्यु ने माफी आपणेवाळु छे,
ने जतरा बी तार भीणी दुवा करे तीनु आखा पर दया कर।
ए यहोवा भगवान, मारी दुवा सामळ;
ने मारी लीलघाय काजे धीयान सी सामळ।
गरान टेमे, मे तुसेक आयड़ो,
काहाकी तु मारी सामळन्यु छे।
ए भगवान-मालीक, देवता मां तारे बराबर कुय नी हय,
तु करे असा कामे, देवता मां कुय काजे बी नी कराये।
ए भगवान मालीक, आखा राज्य काजे तु बणावलु छे,
ची आखी जाती तारे अगळ आय्न मांडा टेकसे,
ने तारा नावेन गुणे गाय्न बड़ाय करसे।1
काहाकी तुत भगवान छे,
तुत जुरभर्यु ने बेसका वारु-काम करन्यु छे।
ए यहोवा भगवान, तारी वाट मेसेक देखाड़, तत्यार मे तारे खरले वाट्ये चालीस।
मारो मन तारे भीणी वाळ ले;
हेरेन करीन की, मे तारो बीहाणो मानीन जीवो।
ए भगवान-मालीक, मे मन लागाड़ीन तुसेक बेसकु वारु कय्स,
ने जलम तारा नावेन बड़ाय कर्या करीस।
काहाकी तारी दया मार पर बेसकी छे।
तु ते मारा जीव काजे पाताळ मां जाणे सी बचाड़ लेदलु।
ए भगवान, हंय बी मटाय करन्या माणसे मारी वीरुद कर रया,
ने वेला-पाड़न्या माणसेन टुळु बी मेसेक मारने करीन हेर रह्यु,
चे ते तारे बारामां ईतरुक बी वीच्यार नी करे।
बाकुन ए यहोवा भगवान, तु बेसकु दयाळु ने बेसकु दयाळु छे; तु धीरु रय्न रीसवायण्यु छे;
ने दया देखाड़न्यु ने खरलु बी छे।
हेरेसी मार भीणी वळीन मारे पर दया कर;
आपसा चाकर्याक तु सक्ती आप;
तारी चाकरायन पुर्याक बचाड़।
मेसेक तारी भलाय्न पुरावा वाटे बेसका-कामेन एक सहलाणी देखाड़,
तीनी सहलाणी काजे देखीन मारा वेरी सरमे पड़ जाय; काहाकी ए यहोवा भगवान,
तुत मारी मदत करन्यु छे, ने मेसेक सांती आपण्यु छे।
Source notes (1)
- Cross-reference उजेंता बुले 15:4
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.