Bhilali Bible
भजन सहीता 85
राज्येन भलाय वाटे दुवा
भजन-गावण्यान डाहला वाटे; कोरह अवल्यातेन भजन।
ए यहोवा भगवान, तु तारा देस पर दया ने नींगा नाखलु,
ने याकुबेन अवल्यातेन दाहड़ा वाळ देदलु।
तु तारा माणसेन पाप काजे माफ करलु;
ने तींद्रा आखा पाप ढाक देदलु।
तु ते, आपसी आखी रीस सेळवी लेदलु;
ने तु तारो कीचवायणु छेटे कर लेदलु।
ए हामरा छुड़ावण्या भगवान, हंय बी, आपसी रीस हामरे पर सी छेटी कर ले!
ने तु अळी हामरा दाहड़ा वाळ दे।
तु जलम हामरे पर रीसवायतु रवसी काय?
तु पीड़ी-डीट हामरे पर कीचवायलु रवसी काय?
तारा माणसे तारे मां खुस हवणु चाहजे करीन,
तु अळी पछु हामरा जीव मां जीव नी वाळे काय?
ए यहोवा भगवान, हामरे पर तारी दया देखाड़,
ने हामुक छुटकारु आप।
यहोवा भगवान, जो काय मेसेक कवसे,
चो मे कांटा लागाड़ीन सामळीस। चु असु कह्यु,
ए मारा माणसे, ए मारा भगत, कदी तुहुंं भुरसु छुड़ीन गांडाय नी करे ती, मे तुहुंंक सुक-सांती आपीस।
छाचलीन तेरो बीहाणो मानीन जीवण्यान छुटकारु धड़ेस आय रह्यु,
तेरेसी आपणा देस मां भगवानेन सेक-सींगार जम जासे।
देखु! दया ने खराय भेळी हंय जासे;
धरम ने सुक-सांती आंबा-सांबा गुळु देदा।
धरती मां सी खराय उगे,
ने सरगेम सी धरम नेचु भाळे।
छाचलीन यहोवा भगवान भलाय्न बरकत आपसे,
ने हामरा खेत मां वारु पाकसे।
धरम भगवानेन नेवताळु बणीन अगळ-अगळ चालसे,
ने तेरे वाटे वाट बणावसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.