Bhilali Bible
भजन सहीता 84
भगवानेन मंदीरेन हर
कोरह अवल्यातेन मीसमर भजन-गावण्यान डाहला वाटे: गीत्तीत रेंग मां गावजु।
ए सीपायड़ान यहोवा भगवान, तारु रवणेन जागु वारुत गमे असु छे!
यहोवा भगवानेन मंदीरेन आंगणा मां जाणे करीन,
तळफी-तळफीन मारु जीव कांदराय आवे;
ने चां जाय्न मे, डील ने मन लागाड़ीन,
जीवतेला भगवानेन गीत गावणेन हेर करो।
ए सीपायड़ान यहोवा भगवान, ए मारा राजा, ए मारा भगवान,
तारा मंदीर मां रवण्या बेसका बरकतवाळा छे;
तारी वेदी धड़े पीला मेकणे करीन, घीनचीड़ी ने दीसरी चिरली पुतरु कर रय।
तारा मंदीर मां रवण्या बेसका बरकतवाळा छे;
चे जलम तारा नावेन गुणे गाया करे।
बरकतवाळा छे चे माणसे, जे तारे मां सी ताकुत हात करे,
ने चे ते तारा मंदीरेम तीरथ करने, सीयोन सहरेन वाट्ये-वाट्ये चाल पड़े।
चे बाका नावेन सुकला खयड़ा माय्न जाय्न, तीनाक झीरवाळु जागु बणाय देय;
ने पाणीन सेरा बी पड़े,
ने चां बेसकी संयबरकत बी हंय जाय।
चे उपर-चापर ताकुत हात करता जाय;
ने तींद्रे माय्न एकेक जणु सीयोन सहर मां भगवान काजे भेळा हवे।
ए सीपायड़ान यहोवा भगवान, मारी दुवा सामळ, ए याकुबेन भगवान,
धीयान लागाड़ीन सामळ!
ए यहोवा भगवान, ए हामरी आड़-आवण्यी ढाळ;
तारा नेवाड़ला राजान मुहुंडा पर वारु नींगा नाख।
हजार दाहड़ा दीसरे जागे वारु रवणे सी,
तारा मंदीरेन आंगणा मां एक दाहड़ु रवणे बेसको वारु छे।
वेरीन घर मां रय्न तेरा धनेन साजल्यु बणने सी,
तारा घरेन डेहळी पर हुबु रय्न पेहरु देणु मेसेक बेसको वारु लागे।
काहाकी ए यहोवा भगवान!
तु वीजाळो आपण्या दाहड़ा जसु छे,
ने आड़-आवण्या ढाळ जसु छे; तु दया करे ने अबरु राखे;
ने जे माणसे छाचाय्न वाट्ये चाले; तींद्रे सी, तु काहनी बी भलाय नी साते।
ए सीपायड़ान यहोवा भगवान, जु तार पर भुरसु करे, चु बेसकु बरकतवाळु माणुस छे!
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.