भजन सहीता 83

ईसरायलेन वेरीन हारने वाटे दुवा

आसापेन भजन, जो एक खास गीत बी छे।

1ए भगवान हुगु मां रवे; ए भगवान,

हुंगरु ने गुंगा मुजुक मां रवे।

2देख ते खरु, तारा वेरी एकदम आवीन कुर्‌राट रह्‌या;

रीस करन्‌या माणसे तारी वीरुद कर रह्‌या।

3चे कदरे-कदरे तारा माणसेन नुकसाण करने करीन मुजगी कर रया,

तारा लाटेक्‌ला माणसेन वीरुद मां मुजगी कर रह्‌या।

4चे मुजगी करीन असा कय रह्‌या: चालु, आपणु ईनुक सारीत देता; तेरेसी हींद्‌रो राजुत सर जाय;

ने ईस्‌रायली जातीन माणसेन नावुत हेर नी रवे।

5चे एक मन्‌या हय्‌न मुजगी कर रया,

ने चे आंबा-सांबा समजतु करीन तारे वीरुद एक्‌कु कर रह्‌या।

6जे ते एदोम जातीन ने ईसमाएलीन जातीन माणसे,

मोआबी जातीन ने हाजीर्‌या जातीन माणसे,

7गबाली जातीन, ने अम्‌मोनी जातीन ने अमालेकी जातीन माणसे,

ने सोर सहर भेळे पलीस्‌ती जातीन माणसे।

8अस्‌सुरी देसेन माणसे बी हींद्‌रे पुठ्‌ये भेसकाय रया,

ने लुतेन अवल्‌यातेन सात-देण्‌या बण रह्‌या।

9हींद्‌रे साते असात करो जसु तुहुंं, मीद्‌यानी साते कर्‌यु,1

ने जसु कीसोन नावेन नदी धड़े, सीरसा ने याबीन साते कर्‌यु।2

10तु ते तीनुक एन्‌दोर सहर मां मारीन नाख देदलु,

ने चे चाहात धरती पर सड़ी गुयला।

11जसु तु मीद्‌यानी जातीन ओरेब ने जाएब काजे मार नाखलु,

तसुत तु हींद्‌रा सीपायड़ान मुख्‌या काजे मार नाख।

जसु मीद्‌यानी जातीन जेब्‌या राजा ने सल्‌मुन्‌ना राजा काजे मार नाखलु;

तसुत हींद्‌रा राजा काजे मार नाख।3

12मीद्‌यानी माणसे ते असा कवतेला,

“आवु, आपणु भगवानेन जागान हकदार्‌या बण जाता।”4

13ए मारा भगवान! हीनु मुजगी करन्‌या काजे बेसकी आंधी मां उडला धुळान तसा,

ने वाहळाम उडला चारान तसा कर दे।

14जसो आक्‌ठो बयड़ा मां लाग जाय,

ने जसी आक्‌ठान आच जंगल काजे बाळ देय,

15तसुत तु, तारी आंधीन साहरे हींद्‌रे पछळ पड़,

ने ईनुक, तारे आंधीन भवरे करीन बीहाड़।

16ए यहोवा भगवान, हीनुक लाजे पाड़ दे,

हेरेन करीन की, जे तुसेक हेरे ने तारो नाव जाण लेय।

17जे जलम सी सरमायता, ने घाबरायला रवे,

हींद्‌रा मुहुंडा काळा हवे, ने जे सर जाणु चाहजे;

18तेरेसी बचला माणसे, जो जाण, लेणु चाहजे की, तुत आखी धरती पर आखाम सी उचे रवण्‌यु भगवान छे,

ने तारो नाव यहोवा छे।