Bhilali Bible
भजन सहीता 82
भगवान आखान नीयाव करन्यु छे
आसापेन भजन
भगवान, सरगेन मंडळी मां हुबु हंय रयु;
चु, देवता सारका पुडार्यान नीयाव करीन कवे।
तक्यार लग तुहुंं कुहर्यान सात दीन,
कत्यार लग झुटु नीयाव करता रवसु।
नीयाव करीन बीन-आसर्याक ने पुरायलाक बचाड़ु,
गरीब-गुरबान ने वेला पाड़ायलान खरलु नीयाव करु।
तेरे भीणी कायनी हंय ने गरीब काजे बचाड़ु, ने भुतड़ान हातेम सी तीनुक छुड़ावु।
चे जाणे नी ने चे समजे नी;
बाकुन आंदारला मां, जां-चां फीर्या करे। तीनुक असो लागे की,
धरतीन पायु कापणे बाजी रयु।
मे ते कवलु, तुहुंं देवता छे, ने तुहुंं,
आखाम उचे रवण्या भगवानेन बेटा छे।1
तेबी, तुहुंं दीसरा माणसेन तसा मरसु,
तुहुंं काहनास नेतान तसा खत्तम हंय जासु।
ए भगवान उठ! ने धरतीन आखा माणसेन नीयाव कर,
तु ते आखी जातीन माणसे पर हक जमाड़न्यु छे।
Source notes (1)
- Cross-reference युहन्ना 10:34
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.