भजन सहीता 81

तीहवार वाटे एक गीत

आसापेन भजन, भजन-गावण्‌यान डाहला वाटे: “गीत्‌तीत” रेंग मां गावजु।

1भगवान, जु आपणु जुर छे, तेरा गीत खुस हय्‌न गावता रवु;

याकुबेन भगवान वाटे, जुरसी गावु।

2वाजा, वाजाड़ने सुरु करु; रमथु ने झुणगु, नांद लीन वाजाड़ु;

ने डुमेकड़ी बी सुवांग लीन वाजाड़ु।

3नवलु चांद देखाये ती, ने पुनवेन दाहड़े बी,

आपणा तीह्‌वारेन दाहड़े सींगो वाजाड़ु।1

4काहाकी असो करनु ते ईस्‌रायली माणसे वाटे कायदु छे;

ने जु नेम, भगवानुत याकुबेन अवल्‌यात वाटे नक्‌खी करलु छे।

5चु, जु नेम-कायदु गवा-पुरावा भेळु युसुफेन अवल्‌यात काजे तीनी टेमे आपलु,

जत्‌यार चु, मीसर देसेन वीरुद करीन सांबु गुयलु।

तीनी टेमे मे एक अनजाण्‌या बुली मां असा कवतेलु सामळ्‌यु:

6मे तुंद्‌रा खुबा पर सी भार उतार देदु;

तुंद्‌रो डालो हाकलनु बंद कराड़ देदु।

7तुहुंं गरान टेमे आयड़्‌या, तत्‌यार मे तुहुंंक छुड़ायु;

मे साताय्‌न वादळाम रय्‌न तुंद्‌री सामळ्‌यु,

ने मरीबा नावेन झीरेन्‌चां तुहुंंक पारख्‌यु।2ज

8ए मारा माणसे सामळु, मे तुहुंंक चेताय दम!

ए ईस्‌रायली जातीन माणसे, तुहुंं सामळी लेवु, ती बेसको-वारु हंय जासे!

9तुंद्‌रे ईचमां काहनो बी देव-धाणी नी रवणु चाहजे; ने तीना देव-धाणीक तुहुंं घुण वांद्‌जु!

10मे तारु यहोवा भगवान छे,

मेत तुहुंंक मीसर देस मां सी नीकाळीन ली आवलु।

तुहुंंक, जो चाहजे चो खुदेन मुंहडा सी मांगु, ती मे आप दीस।3

11बाकुन मारा माणसे मारी नी सामळ्‌या;

ईस्‌रायली माणसे मारु हुकुम नी मान्‌या।

12हेरसी मे तीनुक तींद्‌रे एकहेट्‌ये मने छुड़ देदु, हेरेन करीन की,

चे आपसीत मरजीन अनसारे जीवे।

13“कदी मारा माणसे मारी सामळता,

ती ईस्‌रायली जातीन माणसे मार वाट्‌ये चालता,

14ती मे मारे हातेत, तींद्‌रा वेरीक डंड आपतु;

ने तीनुक ईतरीक वार मां सार देतु।

15जे मार सी कुहराय करे, चे मारे अगळ बींहीन मांडा टेकसे,

तींद्‌री सजा जलम तक रवसे;

16बाकुन मारा ईस्‌रायली माणसे काजे मे पेड्‌ला गहुं खावाड़तु;

ने चापर्‌या वाळा भवारेन रस पीवाड़ीन आफराड़तु।”