Bhilali Bible
भजन सहीता 80
राज्य काजे फीर सी बणावणे वाटे दुवा
भजन-गावण्यान डाहला वाटे सोसनीम एदुत रेंग मां गावजु!
आसापेन भजन
ए ईस्रायली माणसेन आखा गुवाळी करन्या, तु ते युसुफेन अवल्यातेन बी,
गाडरा गुवाळ्या मुजुक अगवाय करन्यु छे; तु ते,
करुब नावेन सरगेवाळा चाकर्या पर बसीन राज करे, तारी ताकत देखाड़!1
तु एप्रेम, बीन्यामीन, ने मनस्से माणसे अगळ,
आपसु सेक देखाड़!
ने हामुक छुड़वणे आव!
ए भगवान, हामरा दाहड़ा वाळ दे;
ने तारा मुंहडान वीजाळो हामरे पर भीबळाव, तीत हामरु छुटकारु हवसे!
ए सरगेन सीपायड़ान मालीक भगवान, हामु ते तारा माणसे छे,
तु कत्यार लग हामरा माणसे पर रीसवायलु रवसी, ने हामरी दुवा नी सामळे?
तु तारा माणसे काजे दुखुत भुगताड़्यु;
हामुक पीणे करीन आसळा आप्यु।
हामरे आड़े-धड़े देसवाळा, हामरा देस पर कब्जु करने करीन लड़ाय पड़्या
ने चे वेरी, हामरी हासी उडाड़्या करे।
ए सरगेन सीपायड़ान भगवान, हामरा दाहड़ा वाळ दे;
ने तारा मुंहडान वीजाळो हामरे पर भीबळाव, तीत हामु बची जासुन।
तु मीसर देसेम सी एक अंगुरेन वेलु ली आयु;
ने ईना राज्य मां सी उखाळीन चु वेलु देस चुप देदु।
तु तीना वेला वाटे च्यारे-मेर पाळ वाळ देदु;
ने चु वेलु उंडेत मुळे भर लेदु, ने वेलान ईना देस मां आखे दुर पाथराय गुयु।
तीना वेलान छाणेन साहळु बयड़ा पर छावाय गुयु,
ने चु वेलु छावाय्न देवदार नावेन मटला झाड़कान तसु हंय गुयु;
ने चु वेलु छावाय्न समुदर धड़े पुग गुयु,
तेरेम डीरा-डीराय्न नदी तक पुग गुया।
अळी तु मटी करली अंगुरेन वाड़ी काजे काहा उदार देदु?
हंय ते वाटे चालीन जाण्या, अंगुरे काजे तुड़्या करे।
जंगली सुहर्या तीना वेला काजे रंदळीन नुकसाण करे,
ने उजाड़्या ढुरे, अंगुरेन वेला काजे चर जाय।
ए सरगेन सीपायड़ान भगवान, सरग मां सी नींगा नाख,
ने दया करीन पछु आव!
ने ईना अंगुरेन वेलान राखवाळी कर।
तीनाक तु तारे डाखरे हात सी चुपलु,
ने आपसा लाटेकला पुर्या काजे पाळे, तसु पाळ्ळु।
वेरी, चु वेलु काट देदा, ने धपाड़ने बाजी रया;
तु तारा माणसेक लड़ देदु, ने चे वेलान तसा सरतात जाय रया।
तारु जेवड़्यु हात समळातु जाय्न, अदमी पर रवणु मेकलु रवे;
तीना अदमी पर जीनाक तु तार वाटे पाळी-पुसीन उबु करलु।
हंय सी हामु, तुसेक छुड़ीन पछा नी जाजे: तु, हामुक जीवाय आप दे,
ने हामु तारोत नाव लीया करसुन।
ए सरगेन सीपायड़ान यहोवा भगवान, हामरा दाहड़ा वाळ दे;
ने तारा मुंहडान वीजाळो हामरे पर भीबळाव, तीत हामरु छुटकारु हवसे!
Source notes (1)
- Cross-reference नीरगमन 25:22
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.