Bhilali Bible
भजन सहीता 79
उजाड़ला सहरेन छुटकारा वाटे दुवा
आसापेन भजन
ए भगवान, आड़जात्या माणसे, तारा देस मां भराय्न तारी जाहगीरी पर हक जमाड़ रया;
चे तारु चुखलु मंदीर ईटाळ देदा;
ने आखा यरुसलेम सहर काजे उजाड़ देदा।1
चे माणसे, तारी चाकरी करन्या माणसे धड़े,
सीकार खाण्या चिरला अगळ नाख देदा, तारी भक्ती-करन्या माणसेन सीकार, जंगली जनवर्याक खावाड़ देदा।
चे ते, तीनुक मारीन तींद्रो लुहीं,
यरुसलेम सहर मां जागे-जागे पाणी सांय उहवाड़्या,
ने तींद्रा धड़ काजे वगे करन्या कुय नी हतला।
आड़े-धड़े वाळा देसेन माणसेन ईचमां हामरी नाव-बद्दी हंय रय;
चे हामरी ठट्टा करीन हासी उडाड़्या।
ए यहोवा भगवान, तु हामरे पर कत्यार लग रीस करतु रवसी?
तारी रीस आक्ठा मुजुक कत्यार लग आवती रवसे?
बाकुन तीना-तीना राज्येन माणसे तुसेक उळखणे नी हींड्ता,
ने तीनु राज्येन माणसे तुसेक नी नाव लेय, तींद्रेत पर रीसवाय।
काहाकी चे याकुबेन बेसकी अवल्यात काजे मार नाख्या।
ने तींद्रा रवणेन जागा काजे बी उजाड़ देदा।
हामरा जुन्ला पाप वाटे, हामुक डंड मां आपे;
बाकुन हामरे पर छाटुस दया कर;
हामरे पर ते कळी-कळीम वीत रय।
ए भगवान, तुत हामरु छुड़ावण्यु छे,
बाकुन हंय तारी बी नाव-बद्दी हंय रय।
हेरेसी तार नावेन बड़ाय वाटे हामरा पाप माफ कर ने हामुक छुड़ाव।
आड़जात्या माणसे जो नी कवणु चाहजे की,
का छे तुंद्रु भगवान?
आड़जात्यान ईचमां तारा चाकर्यान खुनेन बदलु,
हामरा डुळा अगळ उजेंतु हंय जासे।
जबरन कुंडला केदड़ान कासणु सामळी ले;
तीनु केदड़ाक ते मुतेन डंड जड़ने वाळु छे, तार जुरभर्ये हाते तीनुक छुड़वी ले।
ए मालीक भगवान, हामरे आड़े-धड़े वाळा राजवाड़ान माणसे तारी नाव-बद्दी करला छे,
हेरेसी तींद्रे पर सात गुणा बदलु ले!
हामु ते तारा माणसे छे, तारी चाराय्न गाडरा छे।
हामु तुसेक जलम बेसकु वारु कवता रवसु;
ने पीड़ी-डीट तारा गुण गाया करसु।
Source notes (1)
- Cross-reference 2 राजा 25:8-10; 2 ईतीहास 36:17-19; यीरम्या 52:12-14
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.