Bhilali Bible
भजन सहीता 78
भगवान ने आपसा माणसे
आसापेन मसकील भजन
ए मारा माणसे, मारी वात सामळु,
मारा बुल पर मन लागाड़ीन सामळु!
मे मारो मुंहडा सी अक्कलेन कवीस;
ने पेहला बारामां सातायली वात उजेंतु करीस।1
तीनी वात काजे आपणा डाहा-डाहा सामळावला,
तीनी वात काजे आपणु सामळ्या ने जाण गुया।
आपणु जी वात आपणी अवल्यात सी नी सातजे बाकुन कवजे।
मालीक भगवानेन बड़ायन ने तेरी ताकुतेन,
ने तेरा चकराड़न्या बेसका कामेन बारामां तीनुक कय्स।
चु याकुबेन घराणा मां गवा ठेरावलु छे,
ईस्रायलेन घराणा मां कायदा नक्खी करलु छे।
चु नेम-कायदान बारामां चु आपणा डाहा-डाहाक असु हुकुम आपलु की,
तुहुं हीनु, नेम-कायदान सीकापण आपसा पुर्या-पारी काजे आपजु।
हेरेसी आवती पीड़ी जी वात सीकी सके,
ने चे हिम्मत भेळ जी वात आपणा पुर्या-पारी काजे बताड़ी सके;
ने चे, भगवानेन मटला काम काजे नी ईसरे,
बाकुन तेरे पर भुरसु करता रवे,
ने तेरा हुकुम मानता रवे;
ने आपसा आड़ा-बुड़ान तसा नी बणे,
काहाकी चे ते एक-हेट्या ने वीरुद करन्या हतला,
ने तींद्रो मन भुरसा मां टेकलो नी रवे,
ने तींद्रु जीव-आत्मा बी भगवानेन वगु वळीन खरलु नी रवे।
एप्रेमेन कुळीन माणसे ते हत्यार ने वारुत बीलखी देण्या हतला,
तेबी लड़ाय्न टेमे, पछो वळीन ढासणु पड़्यो;
काहाकी चे भगवान साते वायदु पुरु नी कर्या,
ने तेरा नेम-कायदा नी पाळ्या।
चे ते भगवानेन मटला काम,
ने तेरा चकराड़न्या बेसका कामेक हेर नी कर्या।
भगवान ते तींद्रा आड़ा-बुड़ा अगळ,
मीसर देसेन सोअन मुलुक मां चकराड़न्या बेसका काम करलु।
चु समुदर काजे उंडाराम सी दुय वाटा पाड़ीन ईचमां वाट बणाय देदु,
चु पाणी, दुय धड़े वाळीन ढीग लागाड़ देदु। ने तीनुक समुदर पार कराड़ देदु।2
ने चु दीसु वादळान खामबान साहरे,
ने आखी राती आक्ठान खाम्बान वीजाळान साहरे अगवाय कर्यु।3
चु उजाड़्या बयड़ा मां ढाटड़ा फुड़ीन पाणी नीकाळीन पीवाड़्यु,
चु धरतीन उंडेवराम सी पाणी नीकाळीन पीवाड़्यु।
चु मटला दगड़ाम सी बी झीर नीकाळ्यु।
ने चु नदी जसु पाणी उहाड़्यु।
तेबी ईस्रायली माणसे भगवानेन वीरुद मां पाप करता गुया, सुकला बयड़ाम,
चे आखा मां सी उंचा रवण्या भगवानेन वीरुद करता रया।
चे हाय करीन खाणो मांग्या,
असा करीन आपसा मन मां भगवान काजे पारख्या।
चे भगवानेन वीरुद करीन असा कह्या “भगवान, हामुक खावाड़ने करीन,
उजाड़ी बयड़ाम पंगत बसाड़ सके काय?
चु ढाटड़ा मां सी झीर नीकाळीन
नंद्यान तसो पाणी उहाड़्यु ते खरु,
बाकुन आपसा आखा माणसे वाटे रुटा
ने सीकार बी रांदीन आपसे काय?”
असो सामळीन यहोवा भगवान रीसवाय गुयु,
तत्यार याकुबेन घराणा मां आक्ठी लाग गुई,
ने ईस्रायली माणसे पर भगवान बेसकु रीसवाय पड़्यु;
चे ते भगवान पर भुरसु नी कर्या,
ने छुटकारु आपणी ताकुत पर भुरसु नी कर्या।
तेबी भगवान सरगेन वादळाक हुकुम आप्यु,
ने सरगेन बारना उघड़ी गुया।
ने चु तींद्रे वाटे खाणे करीन मन्ना नावेन खाणान सेरा पाड़्यु,
ने सरग सी खाणो आप्यु।4
चे, चो खाणो खादा, जो सरगेवाळा चाकर्या खास खाणो हतलो।
भगवान तीनुक पेट भरीन खाणो आप्यु।
चु आपसी ताकुतेन साहरे सरग मां उगेवणु सी वाहळो चालाड़्यु,
ने दखणाव सी बी वाहळो चालाड़्यु,
ने तींद्रे वाटे वाहळा मां सीकार धुळान तसु पाड़्यु,
ने समुदरेन बालु रेतेन तसु गीणाये नी अतरा चिरला मकल्यु।
ने चु, तींद्रा डेराम लाय्न हीट पाड़्यु,
तींद्रा तम्बुन च्यारे-मेर लाय्न हीट पाड़्यु।
जो खाणेन हेर करला, चत भगवान तीनुक आप देदु।
चे चिरलान सीकार खाय्न आफरी ते गुया,
बाकुन तींद्री हेर पुरी हवणेन पेहेल,
चिरलान सीकार तींद्रा मुंहडात मां हतलो,
ती भगवान तींद्रे पर रीसवाय गुयु,
ने तींद्रे माय्न ताकुतवाळा माणसे काजे मार नाख्यु,
ने ईस्रायली जातीन जुवान्या काजे मारीन हीट पाड़्यु।
असो हयो तेबी चे पाप करतात गुया;
ने भगवानेन चकराड़न्या बेसका कामे पर भुरसु नी कर्या।
तत्यार चु तींद्रा दाहड़ा काजे फालतु मेहनत मां,
ने तींद्रा साले काजे अचानक बीहाणा मां खत्तम कर्यु।
जत्यार बी भगवान तींद्रे माय्न थुड़ाक काजे मार नाखतेलु,
तत्यार बचला माणसे अळी काजे हेरतेला;
ने पापे भीणी सी मन फेरवीन भगवान भीणी वळतेला।
ने तीनुक हेर आवत्लो की, भगवानुत हामरु आडु आवण्यु, चापर्यु छे,
ने आखाम सी उचे रवण्यु भगवानुत हामरु छुड़ावण्यु छे।
बाकुन चे हींद्रा मुंहडा सी तीनुक धुकु देदु,
चे लुच्चाय मेक्या;
काहाकी चे भगवान पर पाक्कु भुरसु नी कर्या।
ने भगवान अगळ जी बुली करला, तीनी बुली मां बी खरा नी हतला।
बाकुन तेबी, बेसकु दयाळु भगवान,
तीनुक माफ कर्यु,
चु आपसी रीस सेळवी लेदु,
ने हेरी रीस काजे आखी रीती सी भड़कणे नी देदु।
तीनाक हेर रयो की माणुस ते मरीन सरन्युत छे,
जे वाहळीन तसी छे ची जाती रवे अळी पछी नी आवे।
ईस्रायली माणसे ते बेसका कावा उजाड़्या बयड़ा मां भगवानेन वीरुद कर्या।
ने उजाड़्या बयड़ा मां तीनाक दुखी करतात रया।
चे अळी-अळीन भगवान काजे पारखतेला।
ने चे ईस्रायली माणसे आपसा चुखला भगवान काजे दुखी करतेला।
चे तेरी ताकुत काजे हेर नी कर्या,
ने चे तीना दाहड़ा काजे बी हेर नी कर्या, तीने दाहड़े भगवान तीनुक वेरीन हातेम सी छुड़ावलु।
चे मीसर देसेन सोअन मुलुक मां, भगवानेन साहरे करला,
चकराड़न्या कामेन सहलाण्या करलु:
चु ते मीस्रे देसेन नद्या काजे पाणीन नुहीं बणाय देदु,
ने चे आपसी नदीन पाणी पी नी सक्या।5
चु तींद्रे ईचमां चावण्या ढास्या मकल्यु, चे तीनुक बेसका चाया,
ने डेडरा बी मकल्यु। ने चे तीनुक बेसका वेला पाड़्या।6
चु तींद्री मेर टिड्डा काजे खावड़ाय देदु,
ने खेती वाड़ीन सब्जी-भाजी बी माकड़ी काजे खावड़ाय देदु।7
चु तींद्री अंगुरेन वाड़ी काजे गारे पाड़ीन खत्तम कर देदु,
ने चु मटला गारे पाड़ीन तींद्रा गुलरेन झाड़का बी खत्तम कर देदु।
चु तींद्रा ढुरे काजे गारा सी,
ने तींद्रा माल-धन काजे वीजळी सी सार देदु।8
चु तींद्रे पर रीसवाय गुयु, चु बेसकु रीसवाय गुयु।
ने चु गरा लावण्या जमेक मकल्यु;
ने तींद्रे पर गरा नाख देदु।
चु आपसी रीस काजे नी सेळव्यु,
ने चु मीसर-वाळान जीव काजे नी बचाड़्यु,
बाकुन तीनुक रुगेन साहरे मार देदु।
मीसर देस ते, हाम जातीन खास रवण्या ने सहलाणी हतलो;
तेबी भगवान मीस्रे देसेन आखा पेहेल-खुळ्या पुर्याक मार नाख्यु।9
बाकुन भगवान आपसा माणसे काजे गाडरा गुवाळ्यान तसु चां सी नीकाळ लायु,
ने बयड़ा मां, तींद्री अगवाय, करीन वाट देखाड़्यु।10
तत्यार ते चे, तेरी गुवाळी मां, बेफीकर्या हय्न चाल्या,
ने तीनुक ईतरोक बी बीहाणो नी लाग्यो। बाकुन मीसर-वाळा तींद्रा वेरी समुदर मां डुब गुया।11
चु तीनुक तेरा चुखला देसेन काकड़ लक,
ईना बयड़ा वाळा देस मां पुगाड़ देदु, तीना देस काजे चु आपसी ताकुतेन साहरे जीतलु।12
चु तींद्रे अगळ सी आड़जात्या काजे ढासाड़ देदु,
तींद्री जागा काजे दुयड़े करीन मापी-मापीन वाट देदु;
ने ईस्रायली माणसे काजे कुळीन अनसारे तींद्रा डेरा मां बसाड़्यु।13
तेबी आखाम सी उचे रवण्या भगवान काजे पारख्या,
ने तेरी वीरुद कर्या,
ने नक्खी करला तेरा नेम-कायदा नी पाळ्या।14
भुरसु छुड़ीन भगवान काजेत धुकु देदा;
ने ची फालतु धंद्लीन तसा धुकु देदा।
चे ते, आड़जात्यान तसा पुजणेन उचला जागा बणावीन,
भगवान काजे रीसवाड़्या, ने चां, घड़ीन बणावला मुरत्या काजे पुजीन, भगवान काजे बेसका कीचवाड़्या।
ज्यो आखो देखीन भगवान, बेसकु कीचवाय गुयु,
तेरेसी चु ईस्रायली माणसेन सात छुड़ देदु।
चु सीलो मां रवण्या खास-तम्बु मां रवणु छुड़ देदु,
चु माणसेन ईचमां उभु करलु, छुड़ देदु।15
ने चु हामरा वेरी काजे आपणा वायदान पेटी पर कब्जु करनेन हक आप्यु,
हेरी सक्ती ने सेक-सींगारेन सहलाणी हतली।16
चु आपसा माणसे पर रीसवाय गुयु,
ने चु आपसा माणसे काजे लड़ाय मां, वेरीन हाते मरने देदु।
ने वेरी माणसे, तींद्रा जुवान्याक आक्ठा मां धपाड़ीन मार देदा,
ने तींद्री जुवान पुरे कुवारलीत रय गुया।
वेरी, तींद्रा पुजाराक तलवारे करीन मार नाख्या,
ने रांडायला बायरा काजे रड़नेन मुखु बी नी जड़्यु।
मालीक भगवान सुय रह्यु हय,
बाकुन अळतेन चु तीना डखीन तसु उचकाणुत जागी ज्यु, जु दारु पीन सुय्न उचकाणुत जुर भेळु जाग्यु।
चु आपसा वेरी काजे ठुकीन ढासाड़ देदु;
ने तींद्री जलमकीत नाव-बद्दी कराड़ देदु।
ने चु युसुफेन अवल्यात काजे छुड़ देदु;
एप्रेमेन कुळीन माणसे काजे नेवाड़ लेदु।
बाकुन यहुदान-कुळीन माणसेत काजे नेवाड़ लेदु,
छाचलीन, चु आपसा लाटेक्ला सीयोन बयड़ाक नेवाड़ लेदु।
ने चां चु आपसा चुखला मंदीर काजे बेसकु उचु बणाय देदु,
ने धरतीन तसु काठु कर देदु,
तेरु पायु चु जलमकुत नाखीन बांद देद्लु।
तत्यार चु आपसा चाकर्या दावुद काजे नेवाड़ लेदु;
तीनाक गाडरान वाड़ा मां सी ली जात रह्यु।
जां भगवान आपसा दुत पीवाड़ने वाळा गाडरान डुळान गुवाळी कर्यु,
चु याकुबेन अवल्यात काजे ईस्रायली राजु भगवानेन माणसेन गुवाळ्यु बणायु।17
दावुद ते खरला मन सी, ईस्रायली माणसेन गुवाळी कर्यु,
ने हातेन हुनरे तींद्री अगवाय कर्यु।
Source notes (17)
- Cross-reference मत्ती 13:35
- Cross-reference नीरगमन 14:21,22
- Cross-reference नीरगमन 13:21,22
- Footnote युहन्ना 6:31
- Cross-reference नीरगमन 7:17-21
- Cross-reference नीरगमन 7:17-21
- Cross-reference नीरगमन 10:12-15
- Cross-reference नीरगमन 9:22-25
- Cross-reference नीरगमन 9:22-25
- Cross-reference नीरगमन 13:17-22
- Cross-reference नीरगमन 14:26-28
- Cross-reference नीरगमन 15:17; यहोसु 3:14-17
- Cross-reference यहोसु 11:16-23
- Cross-reference न्यायीयो 2:11-15
- Cross-reference यहोसु 18:1; यीरम्या 7:12-14; 26:6
- Cross-reference 1 समुवेल 4:4-22
- Cross-reference 1 समुवेल 16:11,12; 2 समुवेल 7:8; 1 ईतीहास 17:7
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.