Bhilali Bible
भजन सहीता 77
दुखेन टेम मां हिम्मत राखणु
भजन-गावण्यान डाहला वाटे: गावण्या यदुतुनेन रेंग मां गावजु!
आसापेन मीसमर भजन
मे भगवान भीणी आयड़ी-आयड़ीन दुवा करीस,
ने चु मारी दुवा कांटा लागाड़ीन सामळी लेसे।
दुखेन दाहड़ा मालीक भगवान काजे हेर्या कर्यु;
आखी रात हात फेलावतु रयु ने ढीलु बी नी हयु ने दुवा कर्यु,
बाकुन तेबी मेसेक आराम नी जड़्यी।
मे भगवान धड़े हेर करी-करीन कासतु रह्यु।
ने फीकुर करी-करीन मारो डील पुरो सुकी गुयो।
ए भगवान, तु मेसेक आखी रात पापण्या ने डुळा मीचणे नी देदु;
मे अतरु जबर घाबराय गुयु की, मारी वाचात बंद रय गुय।
मे वीत्या दाहड़ान बारामां,
वीत्या सालेन बारामां, वीच्यार्या करो।
मे रातेन टेम मां मारा गीत काजे हेर कर्या करो;
ने मे मारा मन लागाड़्या करो। ती मारु जीव असु पुछणे बाजी जाय।
मालीक भगवान मेसेक जलम लग छुड़ देसे काय?
ने अळी चु मार भीणी कदी नी वळे काय?
तेरी दया ने परम जलम तक जाती रवे काय?
तेरु वायदु पीड़ी-डीट फालतु हंय गुयु काय?
भगवान गीणदया करनु छुड़ देदु काय?
चु रीसवाय्न आखी दया करनु वीसरीत गुयु काय?
मे कह्यु की, “जुत मारु दुख छे, की
आखाम सी उचु रवण्यु भगवान ते आपसु दया करन्यु हात पछु कर लेदु।”
मे यहोवा भगवानेन मटला-मटला कामेन वीचार करीस,
मे तारे साहरे पेहला वाराम हवला, छेल-भात्या बेसका काम काजे हेर करीस।
मे तारा आखा काम पर वीच्यार करीस।
ने तारा मटला-मटला काम काजे सुचीस।
ए हामरा भगवान, तारी वाट चुखली छे।
तार बराबर जुर-भर्यु काहनु देवता छे?
छेल-भात्या काम करन्यु भगवान तुत छे,
तु आखा राज्य-राज्यन माणसे पर तारी ताकुत उजेंती करलु छे।
तु तारी ताकुतेन साहरे आपसा माणसे काजे,
याकुब्यान ने युसुफ्यान, अवल्यात काजे छुड़वी लेदलु छे।
ए भगवान, समुदर तुसेक देखे, समुदर तुसेक देखीन बीह गुयो,
उंडलो पाणी बी थर-थर काप पड़्यो।
वादळाम सी मुसळा-धार पाणी पड़्यु;
वादळाम सी तारो गाजणु माणसे सामळ्या;
ने चां सी तारा वीजळीन बीलखी धरती पर जां-चां पड़्या।
आंधीन भवरा मां रवण्यु तु गाज्यु;
ईजळीन वीजाळे आखी धरती पर वीजाळो हंय गुयो,
धरती थर-थर कापीन हालने बाजी गुय।
तारी वाट ते समुदर माय्न
ने उंड्ला पाणी माय्न जाय;
जी वाट ते पेहल काहना काजे मालम नी हतली।
तु ते मुसा ने हारुनेन साहरे, तारा माणसेन,
गाडरान तसु गुवाळी करलु छे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.