Bhilali Bible
भजन सहीता 76
जीतण्यु भगवान
जो एक खास गीत बी छे। भजन-गावण्यान डाहला वाटे: तार वाळा वाजा पुठ्ये गावजु!
आसापेन एक मीसमर भजन,
यहुदान राजवाड़ा मां माणसे भगवानेन नाव लीया करे।
आखा ईस्रायल देसेम चु मटु छे।
चु सालेम सहरे मां डेरु नाखलु छे,
चां सीयोन बयड़ा पर चु आपसु खास तम्बु ताणलु छे।
चां चु, वेरीन धपतेला बीलखा काजे ने, ढाळ्या,
ने तलवार्या भांज नाख्यु,
चु वेरीन आखा हत्यार भांजीन लड़ाय काजे सार देदु।
ए यहोवा भगवान तु ते सेक-सींगार सी भरलु छे,
तु कतरु वारु छे, जत्यार तु तीनु बयड़ाम सी पछु आवे,
चां तु तारा वेरी काजे हाराड़लु।
लड़ाय्न टेमे हिम्मत वाळा डखी माणसे लुटाय गुया,
ने चे मरीन सर गुया,
तींद्री ताकत ने हिम्मत ते खत्तम हंय गुय।
ए याकुबेन भगवान, जत्यार तु रीसवायु,
तत्यार घुल्ला ने घुल्ला पर बसण्या डखी, मरीन सर गुया।
तु अतरुत बीहाणो माने असु छे,
तु रीसवाय जाय,
ती तारे अगळ कुण हुबो रय सके?
तु ते सरग सी नीयाव सामळायु;
कळी तीनी टेमे सामळीन बीही गुय, ने हुगीत हंय रय,
जत्यार भगवान नीयाव करने ने
धरतीन आखा नीचळा माणसे काजे छुटकारु आपणे आयु।
छाचलीन माणसेन रीसेन वजे सी भगवानेन बड़ाय उत्तर बण जासे,
काहनाक काजे रीस लागसे तेबी तु रीस कमर मां बांदीन सेळवी देसी।
आपणा यहोवा भगवान अगळ मान्ता लेवु,
बाकुन ची मान्ता पुरी बी करु; जु बीहे असु छे,
तेरे आड़े-धड़ेन आखा तेरे वाटे भेट ली आया।
चु ते राज करन्यान जीव काजे नीचळु कर देसे;
चु धरतीन आखा राजा वाटे बीहे असु छे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.