Bhilali Bible
भजन सहीता 75
भगवानेन नीयाव
जो भजन-गावण्यान डाहला वाटे: “आल-तासहेत” रेंगो मां गावजु!
आसापेन एक भजन। गीत।
ए भगवान, हामु तुसेक बेसका-वारु कवजे, जत्यार हामु तुसेक बेसका-वारु कवजे,
ती तार नावेन सेक उजेंतु हंय जाय,
तारा चकराड़न्या वारु-कामेत तारा नावेन सेक उजेंता करे।
भगवान कवे, नीयाव करनेन टेमे मेत नक्खी करो;
नीयावेन टेमे, सय-सय नीयाव करीस।
धरती आपसा रवणेवाळा भेळ हाले ते खरी,
बाकुन मेत तेरु पायु काठु करीन,
तीनीक काठीस करो।
हेरेसी मे मटाय करन्या माणसेक कहो: मटाय मां करु,
ने वेरी माणसे सी सींगड़ा मां उचा करु।
आपसो सींगड़ो उचो, मां करु ने अळी-अळीन कहो:
जुर करीन आपसी छाती मां ठुकु; अनड़ाये मां बुलु।
काहाकी मालदारी ने जीवाय्न जीत ते उगण-बुडण सी नी आवे;
ने उजाड़ी बयड़ाम सी बी नी आवे;
बाकुन भगवानुत नीयाव करन्यु छे,
चु एक काजे मटु सी नानु ने दीसरा काजे नानु सी मटु बणाय देय।
यहोवा भगवानेन हातेम एक पीयालु छे,
तीना पीयाला मां बबड़तेलु लाहण्यु अंगुरेन रस छे,
जु रस यहोवा भगवानेन रीस छे, चु तीनात पीयालाम सी नाखी देय,
ने धरतीन आखा कुहर्या माणसेक तेरेम सी आखो पीणु पड़से।
बाकुन मे ते याकुबेन भगवानेन जलम परचार कर्या करीस,
मे जलम तेरो भजन गाया करीस।
चु कुहर्यान आखी ताकत सार देसे,
बाकुन धरमीन ताकत वदाड़से।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.