Bhilali Bible
भजन सहीता 74
देस काजे बचाड़ने वाटे दुवा
आसापेन एक मसकील
ए भगवान तु हामुक जलमकु काहा छुड़ देदु? तारी रीसेन कुळ्ळु ते तारी चराय्न गाडरान तसु छे,
हामरे पर काहा रीसवाय रयु।
तारा माणसेक बी हेर कर तीनुक तु वेगळा वाराम मुल लेदलु,
तु तीनु काजे आपसात माणसे बणने करीन छुड़ाय लेदलु,
सीयोन बयड़ा काजे बी हेर कर, जां तु आपसा मंदीरेम वसतेलु।
बाकुन हंय ते वेरी तारा चुखला मंदीरेक उजाड़ देदला,
पुरा-पुरा उजाड़ला मंदीरेनचां जाय्न देख।
तारा वेरी तारा चुखला मंदीर पर चहड़ीन कुर्राटे,
ने चे जीतेन सहलाणी वाटे आपसा झंडा गाड़ देदला।
चे मंदीर काजे उदारतेला ती असो लागतेलो,
जसु काहनुक झाड़काक कुराड़ वाटे झाटकाय रयु हय।
हंय चे घड़ीन ने टीचीन सींगारला मंदीरेक,
कुराड़ ने घण वाटे ठायंकात तुड़ देदा।
चे तारा चुखला जागाक आक्ठाम धपाड़ देदा, तार नावेन बड़ाय हवे,
तीना मंदीरेक धुळा मां भेसकीन ईटाळ देदा।
चे मन मां कह्या की, हामु हीनु माणसेक ठायंकात सार देसु;
ने चे ईना देसेम जतरे बी जागे भगवानेन मंडळीन जागु छे तीनु घरेक धपाड़ देदा।
हामुक ते भगवानेन हजेरीन काहनी बी सहलाणी देखाव नी पड़ती,
ने भगवानेन अघली वात बताड़न्यु काहनु नी रह्यु;
ती असो कत्यार लग रवसे, कुय काजे पतु नी हय।
ए भगवान, वेरी कत्यार लगुन तारी नाव-बद्दी करता रवसे?
वेरी जलम तार नावेन वात काटता रवसे काय?
तु वेरी माणसे काजे काहा नी सारतु।
तु तारु हात छाती पर सी पछु काहा कर रयु?
ए भगवान, ए मारा राजा, तु ते जुन्ला वाराम सी हामरु राजु छे,
ने बेसका कावा हामरा देस वाटे छुटकारान काम करलु छे।
तु तारी ताकतेन साहरे दरीया काजे दुय हीस्साम वाट देदु;1
तु मटला माछान मुणका फुड़ देदु।
तु लीव्यातान2 नावेन दरीयान घड़सान मुणकाक छेदर्या-छेदर्या कर देदु;
ने चे मुणका उजाड़ी बयड़ाम रवण्याक खावाड़ देदु।
तुत हतलु जु झीर ने खुदरा उहाड़ देदलु;
तुत हतलु जु बारे मोहना उहण्या नंद्या काजे सुकाड़ देदलु।
ए भगवान दीन तारु छे, रात बी तारी छे;
चांद ने दाहड़ु तुत घड़ीन सरगेम मेकलु छे।
धरतीन आखी काकड़ तुत बांद्यु;
उंडाळान ने सींगेन दाहड़ा बी तुत ठेहरवलु छे।
ए यहोवा भगवान, हेर कर, वेरी ते तारी नाव-बद्दी करला छे,
बे-अकल्या माणसे तार नावेन वात काटतेला छे।
तारा माणसेन जीव काजे, जे पेरवा सारका छे, जंगली जनवार्या सारका माणसेन हातेम घुण सुपे,
वेला पाड़ायला तारा माणसेक जलेमकु घुण ईसरे।
तु जु वायदु करलु छे, चु वायदु हेर राख,
काहाकी देसेन आंदारलान जागा मां खुन-खराबु हंय रयु।
तु दुखी काजे लाजवाड़ीन पछु मां वळावे:
गरीब ने लाचार माणसे वाटे तार नावेन बड़ाय करनेन उत्तर बण जा।
ए भगवान उठ ने तुत तींद्रे वीरुद लड़ाय कर,
बीन-अकल्या आखु दाहड़ु तारी नाव-बद्दी करने बाजी रया, ची वात हेर कर।
ए भगवान तारा वेरी हंय बी कुर्राटीन आयड़्या करे:
हेरेसी माणसे मटाय्न वात मां इसरे।
Source notes (2)
- Cross-reference नीरगमन 14:21
- Footnote एक वीतला दाहड़ान दानव जु गड़बड़ी ने बुराय्न ताकतेन एक सहलाणी हंय सके
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.