Bhilali Bible
भजन सहीता 73
तीसरु भाग
(भजन सहीता 73—89)
भगवान धरमी ने कुहर्यान नीयाव करे
आसापेन मीसमर भजन
छाचलीन ईस्रायली माणसे चुखला वाटे भगवान भलास्यु छे,
जींद्रा मने चुखला छे।
मारा पाय ते खीसलनेत वाळा हतला,
मारा पायेन धरावु सरीत गुयलु।
जत्यार मे वेरीक मातला हवतेलु देखलु,
तत्यार तीनु मटाय करन्या पर कुहरायतेलु।
काहाकी चे माणसे वारु छे,
तीनुक जीवाय वाटे काय बी दुख नी झेलनु पड़े।
चे दीसरा माणसेन तसा वेला नी करे;
ने दीसरा माणसे पर जसी गरा आय पड़े, तसी गरा तींद्रे पर नी पड़े।
अळी, चे मटाय काजे हारेन तसा गळा मां पेहेर रया;
ने उदुम आवे ती तींद्रा पुथल्या बण गुयला छे।
तींद्रा डुळान च्यारेमेर चरबी थलो-थलो करे;
ने चे कुहराय करने करीन वीच्यार करता रवे।
चे दीसरान हासी उडाड़े;
ने मटाय सी कुहराय्न वात करे ने दुख देय।
चे सरग मां रवण्या भगवानेन वीरुद मां वात करे,
ने धरती पर माणसे धड़े जुर करीन वात करता फीरे।
हेरेसी भगवानेन माणसे बी तींद्रे भीणी वळ जाय;
ने तींद्री सामळीन तींद्रु हुकारु भरे।
चे कुहर्या माणसे कवे भगवान हामरा भुंड्ला कामेक कसु काय जाणसे?
आखा सी उचे रवण्या भगवान धड़े ते, हींद्री थुड़ीक बी अक्कल नी हय?
ए भगवान, जे माणसे ते कुहर्यात छे;
तेबी दाहड़ीन सेट्लात मातला हवता जाय रया।
मे ते फातलुत मारा मन काजे चुखो कर्यु,
ने फालतुत मारा हातेक धुय्न चुखा कर्यु।
बाकुन मे ते आखु दाहड़ु मार खातु आय रयु;
ने दाहड़ीन संदारे एगुत डंड भुक्ती रयु।
कदी मे कवतु ती हीना वीच्यारेन अनसारे दीसरा अगळ कवणे बाजी जातु,
ती मे भगवानेन माणसे वाटे धुकु देण्यु बण जातु।
मे ईनी वातेक समजणेन कुसीत कर्यु,
बाकुन जो मेसेक नी समजायो।
बाकुन जत्यार मे भगवानेन चुखला मंदीरेम गुयु,
तत्यारुत मेसेक समज मां आयो की वेरी माणसेन अघो काय हवसे।
छाचलीन, तींद्री हालत देखीन मेसेक समज मां आयो की,
तु तीनुक खीसलनी जागा मां ली जाय ने सरनेन जागा मां पाड़ देये।
माय ने बास, चे ते उचकाणुन उजड़ी गुया,
चे घाबराड़नी गराम पड़ीन सर गुया।
असु कुहर्यान जीवाय्न हंय सुक-सांती ते सपना मुजुक छे;
ए भगवान-मालीक, तु नीयाव करने उठसी, ती कुहर्याक सपना साय फालतु कर देसी।
पेहले ते मारा मनो मां कड़वाण भराय गुयली;
मारु जीव बेसकु दुखी हंय गुयलु।
मे ते गांडा मुजुक बे-अकल्यु हंय गुयलु;
मे तार साते ढुरे सारकु बण गुयलु।
तेबी मे पाक्कु जाणो की, तु मेसेक जेवड़्ये हाते धर रयु,
छाचलीन मे तार पुठे छे।
तु मेसेक राय आपीन मारी अगवाय करसी;
ने अळतेन तु मारी ईज्जत करीन मेसेक मान लेसी।
सरग मां तार पाखुर मारो कुण छे? मे तार पुठे रवो अतरोत वारु;
धरती पर अळी मेसेक कांय नी चाहतो।
मारो मन ने डील, हदस खादला ते खरा;
बाकुन ए भगवान, तुत जलम मारा मनेन ताकत,
ने सातायणेन चापर्यु छे।
जे भगवान सी छेटेत रवे, चे सर जासे;
भगवान पर सी भुरसु छुड़न्याक भगवान सार देसे।
बाकुन मार वाटे ते भगवान पुठे रवणुत भलो छे;
मे मालीक यहोवा भगवान काजे मारु आसरु मान लेदलु छे,
हेरेसी की चु मार वाटे वारु-काम करे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.