Bhilali Bible
भजन सहीता 72
धरमी राजान राज
सुलेमानेन भजन
ए सुलेमानेन भगवान, तु ते धरमी ने नीयाव करन्यु छे;
हेरेसी नवाद्या राजाक खरलु नीयाव करने सीकाड़;
राजान पुर्या काजे तारो धरम सीकाड़ हेरेन करीन की,
जु तारा असामी पर धरम भेळ राज करे ने तारा माणसेक नीयाव आपाड़े।
आखा देसेन बयड़ा ने बयड़्या माणसे वाटे,
धरमेन साहरे सुक-सांती आप्या करसे।
जु राजु गरीब माणसेन नीयाव करसे,
ने वेला पाड़ायला गरीब माणसेक छुड़ावणु चाहजे;
ने वेला पाड़न्या माणसेक रंदळी देणु चाहजे।
ए भगवान, जां तक चांद ने दाहड़ु रवसे;
तत्यार लग हेरो राज माणसे पर पीड़ी-डीट रवणु चाहजे।
जु आपसा माणसेन ईचमां असु उतरीन आवणु चाहजे,
जसु झड़ीन पाणी पड़ीन सुकली धरतीक ने खुटड़ाक नीळाकच कर देय।
तेरा राज मां धरमीन दाहड़ा वळ जासे, ने जां तक चांद बणीन रवसे,
चां तक जलम सुक-सांती बेसकी सांवटी रवणु चाहजे।
जु ईने दरीये सी पले दरीये लग,
ने मटली नंद्ये सी धरतीन छेव लग राज करनु चाहजे।
उजाड़्या बयड़ाम रवण्या लग, तेरे अगळ मांडा टेकीन वांदणु चाहजे;
ने तेरा वेरी तेरे अगळ धुळु चाटसे।
दरीया धड़्ये वाळा तरसीस देसेन राजा, ने काळा-पाणीन राज करन्या,
सेबा देसेन ने सबा देसन राजा बी तेरे अगळ भेट मेकणु चाहजे।
आखा राजा लग तेरे अगळ उबड़ु पड़ीन वांदणु चाहजे,
आखा राजेन माणसे तेरा हकेम हय्न सेवा करनु चाहजे।
आपणु राजु ते लीलघाय करन्या गरीब-गुरबान,
ने दुखी ने नी-साहरु माणसेन सात देसे।
जु कमजुर ने गरीब माणसे पर दया करसे;
ने तीनुक बचाड़से।
जु तींद्रा जीवेक कुहर्या ने उदम आवण्या माणसे सी बचाड़से,
तींद्री जीवाय ते तेरी नींगा मां महंगी छे।
आपणु राजु बेसका साल लग जीवतेलु रवणु चाहजे,
ने सेबा देसेन सोनाम सी ईनाक सोनो आपणु चाहजे;
माणसे तींद्रे वाटे दुवा करसे,
ने दाहड़ीन तीनाक वारु कह्या करसे।
देसेन बयड़ान चोटी पर खेत मां बेसका अन पाकणु चाहजे;
आखी मेर, लबानोन मुलुकेन झाड़कान;
ने आपणा सहरेन माणसे चारान तसा,
वेल वदीन फलो-फलो करनु चाहजे।
आपणु राजु जलम बणीन रवणु चाहजे;
दाहड़ु जां तक बणीन रवे तसो तेरो नाव जलम हेर रवणु चाहजे,
आखा राजेन माणसे तेरे साहरे बरकतवाळा हंय जाणु चाहजे,
ने तीनाक वारु कवणु चाहजे।
वारु छे यहोवा भगवान, जु ईस्रायली माणसेन भगवान छे;
चकराड़न्यो वारु-काम, चु अतरुत करे।
तेरो सेक-सींगार भर्यो नाव जलम वारु रवसे;
ने धरती पर तेरु सेक-सींगार छावायलु रवसे ने असोत हवसे,
आमीन अळी आमीन!
ईसेन पुर्या दावुदेन, दुवान भजन खत्तम हयो।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.