Bhilali Bible
भजन सहीता 71
एक डाहला माणसेन दुवा
ए यहोवा भगवान, मे तारे आसरे आय रयु;
मेसेक कदी बी लाजे घुण पड़ने देय मारी दुवा सामळीन मेसेक छुड़ाय ले।
तु ते धरमी छे, तारा धरमेन अनसारे मेसेक छुड़ाव, ने मारी सामळ,
तुत मारु छुटकारु नक्खी करलु छे।
तु मार वाटे, आडु-आवण्या चापर्यान तसु रवणेन जागा बण,
तेरेमां तु मार वाटे सातायणेन चापर्यु बण,
तेरी आड़ मां, मे कत्यार बी आसरु ली सको।
ए मारा भगवान, तीना वेरीन हातेम सी बचाड़,
तीना नी-दयाळा माणसे सी बचाड़, जु कुहराय कर्या करे।
ए मालीक, ए यहोवा भगवान, मे ते तारीत आस करो कवळु-जुवान हतलु,
तीं सीत तार पर भुरसु करतु आय रयु।
बाकुन मे पयदा हयु, तीं सीत तारे आसरे मटु हयु;
आय्सीन कुखेम सी तुत मेसेक नीकाळ्यु;
हेरेसी मे जलम तारोत गुण गाया करीस।
खरान, तु मारु आसरु ने ताकत छे,
तेबी बेसका माणसे मारी हय्न हालत देखीन घाबराय रह्या।
मे ते तारा गुण गाया करीस;
ने आखु दाहड़ु तारा सेक-सींगारेन वात कह्या करीस।
डाहवारा मां मेसेक मां ईसरे; मारो ते उतरतो खुन छे,
अळतेन मेसेक मां छुड़े।
मारा वेरी भेळा हय्न मेसेक मारनेन युजना बणाय रया,
चे डुकाय्न असा कवे,
भगवान हीनाक छुड़ देदलु छे;
चालु, हेरे पछळ पड़ीन हीनाक धर पाड़ता,
हीनाक छुड़वण्यु ते काहनु नी हय।
ए भगवान, मारेन्चां सी छेटु मां हवे, ए मारा यहोवा भगवान,
मारी सात देणे करीन मामार आव।
जे मारा जीवेन वीरुद करन्या छे, चे लाजवाय जाणु चाहजे,
ने जलमकात सर जाणु चाहजे जे मारो नुकसाण करनेन हर कर रया,
तींद्री नाव-बद्दी हंय जाणु चाहजे,
ने तींद्रु अबरु जात रवणु चाहजे।
मे ते जलम तारी आस करतु रय्स,
ने तारा गुण अळी-अळीन गावतु रय्स।
तारा धरमी कामेन बारामां,
ने तार साहरे जड़न्या छुटकारान बारामां,
आखु दाहड़ु देखाड़तु रय्स, तेबी तारा करला कामेन छेव नी लेवाये।
मे मालीक भगवान ने ताकतवाळा कामेन बड़ाय करतु जाय्न तारा मंदीर मां आय्स,
मे नीसतु तारात धरमेन वात देखाड़ीस।
ए भगवान, मे कवळु-जुवान हतलु, तीं सीत तु मेसेक सीकाड़तु आय रयु,
ने हंय लग मे तारा चकराड़न्या वारु-कामेन परचार करतु आय रयु।
मेसेक ते आवती पीड़ीन आखा माणसेक बी,
तारा ताकतवाळा वारु-कामेन बाराम कवणु छे, हेरेसी ए भगवान,
डाहवारा मां बी मेसेक झुण ईसरे; मारा कान्या फुलाय जासे,
तेबी मेसेक काठु राखजी।
ए भगवान, तारो धरम बेसको-मटो छे।
तु ते बेसको-मटो काम करलु छे ए भगवान,
तार बराबर ते काहनु नी हय?
तु ते, मेसेक कय-कय्न वीताड़्यु;
बाकुन हंय तु मेसेक वारु करीन मारा दाहड़ा वाळसी,
ने धरतीन उंडाराम सी मेसेक नीकाळ लेसी।
तु मारा दाहड़ा वाळीन ईज्जत राख लेजी,
ने पछु वळीन मेसेक सांती आपसी।
ए मारा भगवान मे पावळी वाजाड़ीन,
तुसेक बेसकु वारु कय्स,
ए ईस्रायली माणसेन चुखला भगवान, झुणगु वाजाड़ीन,
मे तारी छाचाय्न गुण गाय्स।
तु मेसेक बचाड़ लेदलु छे,
हेरेसी मे जुर्येत तारा गुण गाय्स,
मारु जीव बी तारोत गुण गावसे।
जे मारो नुकसाण करनेन वीच्यार कर रवला,
ने लाजवाय्न काळा कुस पड़ गुयला छे,
हेरेसी मे आखु दाहड़ु तारा धरमेन वात देखाड़तु रय्स।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.