भजन सहीता 70

मद्‌त वाटे भगवान धड़े दुवा

(भजन सहीता 40:13-17)

भजन-गावण्‌यान डाहला धड़े, भगवानेन हेर करावण्‌यु दावुदेन भजन।

1ए भगवान! मेसेक बचाड़ ले;

ए यहोवा भगवान! उतवाळ्‌युत मारी सात दे।

2जे मारु जीव लेणे कर रया, चे लाजे पड़ जाणु चाहजे;

चे काळा कुस पड़ जाणु चाहजे।

जे मारो नुकसाण करनेन हेर कर रया, चे पछा ढास पड़नु चाहजे,

ने तींद्‌रु अबरु जात रहणु चाहजे!

3जे अहोय लला, जाण्‌यु काय? कवीन मारी हासी उडाड़े,

चे लाजवाय्‌न पछा फीरीन ढास जाय।

4बाकुन ए भगवान! जतरा बी तुसेक हेरे,

चे आखा तार वाटे खुस हय्‌न गखळायणु चाहाजे!

जे माणसे छुटकारा वाटे तारीत आस करता रवे, चे जलम असात कवता रवणु चाहाजे,

“हामरु भगवान बेसकु-मटु छे!”

5मे ते नीचळु ने गरीब छे,

ए भगवान, तुत मेसेक छुड़ावण्‌यु ने मारी मदत करन्‌यु छे।

ए मारा भगवान! वार मां लागाड़े;

मामार मारी मदत कर।