Bhilali Bible
भजन सहीता 69
गरा मां सी बचणे करीन दुवा
दावुदेन भजन, भजन-गावण्यान डाहला वाटे सोसनीम रेंगो मां गावजु
ए भगवान, मेसेक बचाड़,
पाणी ते मारे गळे लग आय लागलो छे।
मे उंड्ला पणा मां गाड़ायणे बाजी र्यु,
पणा मां मारा पायेक धरावु नी जड़तु,
मे उंड्ला पाणी मां आय ज्यु;
ने पाणीन झलक मां डुबणे बाजी रयु।
आयड़ी-आयड़ीन मारु गळु सुक गुयु,
ने भगवानेन वाट देखी-देखीन,
मारा डुळा धुंधळा पड़ गुया।
जे असलुत मार भीणी रीस करे,
चे मुणकान कान्या मुजुक गीणाये नी अतरा छे,
झुट मेकीन मेसेक बरबाद करन्या,
वेरी बेसका ताकतवाळा छे;
मे जो नी हापक्यु, चो बी आपणु पड़ रयो।
ए भगवान, तु ते मारी गांडाय काजे जाणे;
ने मारा पाप तार अगळ उजेंता छे।
ए मालीक, ए सरगेन सीपायड़ान यहोवा भगवान,
जे तारी वाट देखे, तींद्री आस मारी गरान साहरे नी टुटणु चाहजे;
ए ईस्रायली माणसेन भगवान, जे तुसेक हेरे,
तींद्रो मुंहडो मार साहरे काळो नी हवणु चाहजे।
तारी भक्ती करनेन साहरे मारी नाव-बद्दी हवली छे,
ने मे लाजवाय गुयु।1
मारा भाय्स, मार साते अंजानला सांय वेहवार कर रया;
मारा सगा भाय्स, मेसेक दीसरा देस वाळा बणाय रया।
काहाकी तारा घरेन झींग मेसेक आक्ठान तसी धपाड़ देदी,
ने चे जसा तारी नाव-बद्दी करे, तसात मारी बी नाव-बद्दी कर रया।2
जत्यार मे रड़ी-रड़ीन उपास पाळो,
तत्यारुत चे मारी नाव-बद्दी करे।
जत्यार मे दुखी हय्न गंटाट्यान पुथल्या पेहरो;
तत्यार चे माणसे मारी हासी उडाड़तेला।
सहरेन बारना धड़्ये बसण्या डाहला मारी चुगली करे,
ने दारुड़्या मेसेक चेंगल्या पाड़ीन गीत गावे।
ए यहोवा भगवान तु मारी सामळीन दया करसी,
असी टेम करीन मे दुवा करो;
ए भगवान, तु दया करीन बचाड़नेन,
वायदान साहरे मारी सामळी ले।
मेसेक पणाम सी नीकाळ; नीते कांखुर माय्न पणु मेसेक अगुत गाड़ लेसे,
जे मार भीणी रीस करे, तींद्रे सी बचाड़;
मेसेक ईना उंड्ला पाणीम सी नीकाळ।
पाणीन भवरु मेसेक डुबाड़ लेसे,
ने मे उंडला पाणीन बुंदे लग जात रय्स,
ने नी मे पाताळ मां जाम।
ए यहोवा भगवान, मारी सामळी ले, काहाकी तारो परम ने दया बेसकी-वारु छे,
तारी मटली दयान साहरे मार भीणी धीयान दे।
मे ते तारु चाकर्यु छे, मे गरा मां पड़ रयु;
अळतेन छाटुस आय्न मेसेक बचाड़ ले मेसेक देखीन आड़ु मां भाळे।
मार धड़े आय्न मेसेक छुड़वी ले;
मारा वेरीन हातेम सी मेसेक छुड़ाय ले।
वेरीन साहरे मारी नाव-बद्दी हवणु,
ने मारो लाजे पड़नु ने मारु अबरु जात रवणु:
जो आखो तु जाणे वेरीन आखा काम तु देखीत रयु।
मारो मन नाव-बद्दीन साहरे हसताय्न हदस खाय रयु।
मे असी आस कर रवलु की,
काहनु ने काहनु मार पर दया करसे, बाकुन काहनु बी दया नी कर्यु,
सांती आपण्यान आस कर रवलु, बाकुन काहनु नी आयु।
चे मारा खाणा मां जहर भेसकी देदा, ने मारी पीस भांजणे करीन,
अंगुरेन बीगेड़लु रस आप्या।3
तींद्री मेजवानी पंगत तींद्रे वाटे फांद बण जाणु चाहजे;
ने ची तींद्रा मेजवान्या वाटे जाळ बण जाणु चाहजे।
तींद्रा डुळा आंधळा हंय जाणु चाहजे, ने तीनुक काय बी देखायणु नी चाहजे;
ने तींद्री कमर लुली हय्न जलम कापता रवणु चाहजे।4
ए भगवान, तारी रीस तींद्रे पर भड़क्यु;
ने तारी रीसेन आच तीनुक भसम कर देणु चाहजे।
तींद्रो तम्बु उजड़ी जाणु चाहजे;
तींद्रा पड़ावा मां काहनु नी वसणु चाहजे।5
काहाकी तीनाक तु मार्यु, तीनाक चे चमळी देदा;
ने तीनुक तु घायेल कर्यु, चे तींद्रा दुख काजे वदाड़ देदा।
तींद्रा पापेन डुचरो भराय गुयलो छे,
अळतेन तु डंडेन हुकुम आप चे तारु धरम हात नी करनु चाहजे।
तींद्रो नाव जीवाय्न किताप मां सी काट देणु चाहजे;6
ने धरमी भेळो नी लिखणु चाहजे।
बाकुन मे ते दुखी छे ने वेला कर रयु; अळतेन ए भगवान,
तु मेसेक छुड़ाय्न उचले जागे बसाड़।
मे गीत गाय्न भगवानेन नावेन गुण गाय्स;
ने भगवान काजे बेसकु वारु कय्न तेरी बड़ाय करीस।
असो करनु ते, यहोवा भगवानेक, बेलेन बादा सी बी, वारु लागसे;
सींगड़ा ने खुर्या वाळा बेलेन बादा सी बी वारु भावसे।
मारी जीत देखीन नीचळा माणसे खुस हवसे ए भगवानेक हेरन्या,
तुंद्रो मन खुस हंय जाणु चाहजे।
काहाकी यहोवा भगवान गरीबेन सामळे,
ने चु आपसा माणसेक नेचा नी समजे, तीनुक हंय जबरन कुंडला छे।
सरग ने धरती तेरा गुण गावणु चाहजे;
समुदर बी आखा जीव जंतु भेळ तेरा गुण गावणु चाहजे।
काहाकी भगवान, सीयोन सहरेन माणसेक गुलामी मां सी छुड़ावसे,
ने यहुदा जीलान आखा सहरेक पछु बणावसे,
ने तेरा चाकर्या माणसे अळी चां वसीन, तीनु सहर पर हक करसे।
भगवानेन चाकर्यान अवल्यात बी, तींद्रा हकेन हीस्सु लेसे,
ने तींद्रा नावेन परम करन्या चां वस्से।
Source notes (6)
- Cross-reference यीरम्या 15:15
- Cross-reference युहन्ना 2:17
- Cross-reference मत्ती 27:48; मरकुस 15:36; लुका 23:36; युहन्ना 19:28,29
- Cross-reference रोमीयो 11:9,10
- Cross-reference नेवताळान काम 1:20
- Cross-reference नीरगमन 32:32; उजेंता बुले 3:5; 13:8; 17:8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.