Bhilali Bible
भजन सहीता 68
ईस्रायल मां जीतणेन गीत
भजन गावण्यान डाहला वाटे दावुदेन मीसमर भजन
भगवान उठीन, आपसा वेरीक रावण्या-तीवण्या कर देणु चाहजे;
ने तेरा आखा वेरी ढास जाणु चाहजे।
जसु कुळ्ळु वाहळाम उडी जाय, तसात तेरा वेरी उडी जाणु चाहजे,
जसी मोमबत्ती आक्ठाम पीगळी जाय,
तसात तेरा वेरी खत्तम हंय जाणु चाहजे।
बाकुन धरमी माणसे खुस हवसे; ने चे भगवान अगळ खुसी मनावसे,
चे बेसका खुस हय्न गखळायसे।
भगवान वाटे गीत गावु; तेर नावेन बड़ायन गीत गावु,
वादळान घुड़ा-गाडी चालाड़न्यु छाचलीन आपणु भगवान छे;
तेरी बड़ाय करु तेरो नाव यहोवा छे, हेरेसी तेरे अगळ खुस हंय जावु।
यहोवा भगवान ते, आपसा चुखला-जागा मां, रांडायलान खरलु नीयाव करे,
भगवान ते पुरायलान बास बण जाय।
चु पुरायलान बी घर-बार वाळ देय,
ने चु जबरन कुंडलाक खुसी आपे;
बाकुन जे भगवानेन वीरुद चाले तीनुक सुकली जागा पर वसणु पड़से।
ए भगवान, जत्यार तु आपसा असामी काजे मीसर देसेम सी नीकाळीन लायु,
तत्यार उजाड़ी बयड़ा मां तींद्रे अगळ-अगळ चाल्यु।
तत्यार धरती कापी ने सरग बी भगवान अगळ टपकणे बाजी गुयो,
तीनी टेमे सीनाय बयड़ान्चां तेरी हजरी देखीन,
धरती काप गुय ने सरग रडी पड़्यो।1
ए भगवान तु च्यारेमेर पाणीन सेरा पाड़्यु: तारा माणसेन जाहग्रीन जागा ते सुकली हतली,
छाचलीन ए भगवान तु चां बी पाणीन सेरा पाड़ीन, तीनीक नीळीकच कर देदु।
तारा माणसे तेरेम वसणे बाजी गुया,
ए भगवान, तु तारी भलाय्न साहरे तीनु गरीब वाटे बी तीयारी कर्यु।
भगवान मालीक हुकुम आपे,
ने खुस-खबर सामळावण्या बायरान एक मटलु टुळु तीयार हंय जाय।
वेरी राजा ते आपसा-आपसा सीपायड़ा भेळ बेसका ढासणे बाजी रया,
ने जीतण्यान बायरा जे घरेम काम करे, चे वेरीन रवलो समान वाटणे बाजी जाय।
काय तुहुंं, तीना, गाडरान वाड़ान ईचमां सुय जासु काय?
चां जासु, तत्यार तुहुंक बी चांदीन झाळ चहड़ावला पेरवान पाखड़ा,
ने पेळ्ळा सोनान झाळ चहड़ावला पीछड़ा जड़ जासे?
आपणु भगवान, जु आखाम ताकत वाळु छे,
चु आखा राजाक, सलमोन बयड़ा पर पड़न्या बरफेन तसु रावण्या-तीवण्या करने बाजी रयु।
बासान मुलुकेन बयड़ु लकेत चटी वाळु बयड़ु छे;
जु भगवानेन बयड़ु बी कह्वाये।
ए बासान बयड़ान चटी, तुहुं तीना बयड़ा भीणी कुहराये काहा भाळ रया,
तीना बयड़ा काजे भगवान आपसु रवणेवास बणाय लेदलु छे।
यहोवा भगवान चां जलम रवसे?
भगवानेन घुड़ा-गाडी ते हजारु-लाखु छे;
जसु भगवान-मालीक चुखला सीनाय बयड़ा पर हतलु।
ए यहोवा भगवान, तु जीत हात करीन उपर गुयु;
ती वेरी माणसे काजे बांदीन पुठे ली गुया2,
ने तु हामरे वाटे तीनु माणसे धड़े भेट लेदु तीनु एक-हेट्या माणसे धड़े लग भेट लेदु,
जे तु चां वसे करीन वीरुद कर्या।
वारु छे भगवान-मालीक,
जु दाहड़ीन आपणा दुखेन भार हाकले,
ने आपणुक छुड़वण्यु।
जु भगवान, आपणे वाटे छुटकारान काम करन्यु छे,
मुत सी बचाड़णे वाळु बी यहोवा भगवानुत नीकाळे।
छाचलीन भगवान आपसा वेरीन मुणको, ने अळी-अळीन गुनु करन्यान वाटे चाले,
तेरा झेतरा कान्या सी भरायला मुणका काजे छेदड़्या कर देसे।
भगवान-मालीक कयु, मे ढासला वेरीक बासान मुलक सी,
ने उंडला दर्यान बुदाम सी नीकाळ लाय्स।
काहाकी, तुहुं आपसा वेरीन लुहीं मां तुंद्रा पाय डुबाड़े,
ने तुंद्रा कुतराक बी वेरीन लुहींन ने सीकारेन वाटु जड़े।
मारा भगवान, रेड़ माणसे तुसेक जीतणेन रेली भेळ आवतेलु देखला छे,
ए मारा भगवान ए मारा राजा, चुखला मंदीर भीणी तुसेक, सेक-सींगार भेळ आवततेलु देखला छे।
गावणे वाळा अगळ-अगळ,
ने वाजाड़ने वाळा पछळ-पछळ चाल्या आड़े-धड़े छल्ली पुरे, डुमेकड़ी वाजाड़ती जाय्न चाल्या।
ए ईस्रायली खानदानीम सी पयदा हवण्या, यहोवा भगवानेक बेसकु वारु कवु,
मटली मंडळी मां भगवानेक बेसकु वारु कवु।
तीनी मंडळी मां नानली कुळीन बीन्यामीन आखा अगळ छे;
चां यहुदा कुळीन डाहला, आखा घराणा भेळ छे;
जबुलुन कुळीन ने नप्ताली कुळीन डाहला बी चां छे।
मे सामळ्यु, तारु भगवान तुसेक ताकत आपणेन वादु करलु छे
अळतेन ए भगवान, आपसी ताकत देखाड़, जसु तु वीतला दाहड़ा मां हामरे वाटे ताकत देखाड़लु।
यरुसलेम सहरेन आपसा मंदीर मां सी आपसी ताकत देखाड़,
तेरेसी दीसरा राजा आपसो भेट चां लावे।
जे माणसे पाणी मां रवण्या पाण घुड़ान तसा छे,
तीनु सांड्यान मटला टुळाक, ने राज-राजेन केवड़्याक बी लड़ ती,
चे वेरी बेसकी सावटी चांदी लाय्न तुसेक वांदसे,
जे माणसे लड़ाय कराड़ीन खुस हवे ने तीनुक तु रावण्या-तीवण्या कर देय।
अळतेन ए भगवान, मीसर देसेम सी मंत्रीया, भेट लीन आवसे;
ने कुस देसेन माणसे तुसेक भेट आपणे करीन दवड़ीन आवसे।
ए धरती पर रवण्या आखा राज राजेन मालीक भगवान वाटे गीत गावु,
तेरी बड़ायन गीत गावु।
जु भगवान, जलमकु सरग मां आपसी घुड़ा-गाडी चालाड़तु आय रयु,
चु आपसी अवाज सामळावे,
तेरी अवाज ते बेसकी ताकतवाळी छे।
भगवानेन ताकुतेन बड़ाय करु,
तेरु सेक ईस्रायल पर भबळ्या करे,
तेरी ताकत सरग-मंडळी मां उजेंती हय।
ए भगवान, तु आपसा चुखला-मंदीर मां बीहाणो माने असु छे,
ए ईस्रायली माणसेन भगवान,
तारा माणसेक जुर ने ताकत आपण्यु छे।
भगवान बेसकु वारु छे।
Source notes (2)
- Cross-reference नीरगमन 19:18
- Cross-reference ईफीसीयो 4:8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.