Bhilali Bible
भजन सहीता 67
आखा राजेन माणसे भगवानेन गीत गावणु चाहजे
भजन-गावण्यान डाहला वाटे, तारवाळा वाजा पुठे, मीसमर भजन
भगवान हामरे पर गीणदया करनु चाहजे, ने हामुक संयबरकत आपणु चाहजे,
ने चु हामरे पर आपसा मुंहडान वीजाळो बी भबळावणु चाहजे।
काहाकी तारी वाट आखी धरती पर, ने तेरेत वगे सी जड़न्यु छुटकारु,
आखा राजेन माणसे पर उजेंतु हवे।
ए भगवान, देस-देसन माणसे, तारा गुण गावण्या बणे,
आखा देसन माणसे तारी बड़ाय करे।
देस-देसेन माणसे खुस हवणु चाहजे, ने खुसीन गीत गाया करनु चाहजे,
काहाकी तु देस-देसन माणसेन छाचाय्न साहरे नीयाव करसी,
ने तु धरतीन आखा देसे माणसेन अगवाय करसी।
ए भगवान, देस-देसन माणसे तारा गुण गावण्या बणनु चाहजे,
आखा देसन माणसे तारा गुण गावण्या बणनु चाहजे।
धरती, मेरेन संयबरकत आपसे ने भगवान,
जु आपणु भगवान, आपणुक संयबरकत आपसे।
धरतीन काकड़ लग रवण्या माणसे,
भगवानेन बीहाणो माननु चाहजे, करीन भगवान आपणुक संयबरकत आपे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.