Bhilali Bible
भजन सहीता 66
बेसकु वारु ने बड़ायन गीत
भजन गावण्यान डाहला वाटे मीसमर भजन
आखी धरतीन माणसे भगवान वाटे खुसीन गीत गावु, ने तेरी बड़ाय करु!
तेर नावेन सेक-सींगारेन भजन वाजा गाजा भेळ गावु;
सेक-सींगार भेळ तेरीत बड़ाय करु।
भगवानेक असा कहुं, तारा काम बेसका वारु छे,
तारी बेसकी ताकत देखीन,
तार अगळ तारा वेरी बीहाणो मानसे।
आखी धरतीन माणसे तुसेक पाये पड़ीन वांदसे,
ने तारा गुण गावसे,
चे तारात नावेन गुण गावसे।
आवु आखा माणसे, भगवानेन कामेक देखु,
माणसे वाटे तेरा कामे ते चकराड़े असा छे।
चु ते दर्याक सुकली जागा बणाय देदु;1
हामरा आड़ा-बुड़ा मट्ली नदी काजे चालीन वेणकी गुयु।2
चां आपणु भगवानेन वजे सी खुस हवजे।
जो चु आपसी ताकतेन साहरे जलम राज करे;
चु आखा राजेन माणसे भीणी भाळतु रवे।
भुरसु नी करन्या माणसे आपसो मुणको उचो मां करु।
ए आखा देसेन माणसे! हामरा भगवानेक वारु कवु,
हामरे भेळता जुर्येस तेरी बड़ायन गीत गाय्न सामळावु।
चु हामु आज लग जीवत्ला राखे;
चु हामुक खीसलीन पड़ने नी देदु।
छाचलीन ए भगवान, तु हामुक पारेखलु;
ने चांदीन तसु गाळीन चुखा करलु छे।
तु ते हामुक जाळेम फांदाड़ देदु;
ने हामरे पर बेसकु-मटु बुझ मेकीन कमर लुली कर देदु।
ने तु वेरीन साहरे तेरी घुड़ा-गाड़ी हामरा मुणका पर चहड़ावलु;
ने हामुक आक्ठा माय्न ने पाणी माय्न ली गुयलु;
बाकुन तेबी तु हामुक चां सी नीकाळीन सुक-सांतीन जागा मां ली आयु।
ए भगवान मे आक्ठान बादा लीन तारा मंदीर मां आय्स;
जी-जी मानता लेदलु छे, ची आखी पुरी करीस।
ची आखी मानता ते, गरान टेमे लेदलु,
तत्यार ची मानता हुटड़े ने मुंहडा सी मान्लु।
मे तुसेक, मातला जनवार्या मारीन आक्ठान-बादा चहड़ावीस,
ने गाडरा चुयणीन बादा चहड़ावीस;
ने मे बेल ने बुकड़ा मारीन बी बादा चहड़ावीस।
ए भगवानेन बीहाणो मानीन जीवण्या आखा माणसे!
आय्न सामळु, मे बताड़ीस की, चु मार वाटे काय-काय करलु छे।
मे तीनाक आयड़तु जाय्न तेरे धड़े दुवा कर्यु;
तत्यार ते, मारा जीवेम सी तेरी बड़ाय गीते गावीन कर्यु।
कदी मे, मारा पापेक मारा मन मां रवणे देतु,
ती मालीक-भगवान मारी नी सामळे।
बाकुन भगवान ते, मारी सामळ्ळु छे;
छाचलीन चु मारी दुवा भीणी धीयान देदु।
वारु छे भगवान,
चु मारी दुवा नी टाळ्यु ने,
चु आपसान दया मार सी छेटे नी कर्यु!
Source notes (2)
- Cross-reference नीरगमन 14:21
- Cross-reference यहोसु 3:14-17
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.