Bhilali Bible
भजन सहीता 65
भगवानेन बड़ाय ने बेसकु वारु
भजन गावण्यान डाहला वाटे दावुदेन मीसमर भजन
ए भगवान सीयोन सहर मां बड़ायन तारी वाट देखे;
ने तु हामुक माफ करीन हामरी मान्ता छेटे कर देदु।
ए दुवा सामळनेवाळा आखा माणसे तारेत धड़े आवसे।
तु हामरा पाप हामुक बेसका भारी लागे,
बाकुन तु हामुक माफ करीन पाप छेटे कर देदु।
तारा मंदीरेन आंगणाम वसणे करीन,
तीनाक तु नेवाड़ीन साते लाव, चु बेसकु वारु छे।
हामु तारा घरेन आंगणाम आय्न, तारा चुखला मंदीर मां आय्न,
चां वारु-वारु आखी चीज सी आफरी जासु।
ए हामुक छुटकारु आपण्या भगवान;
तु ते धरतीन खुणे-कुपरे रवण्या माणसेन,
ने समुदर धड़्ये रवण्या माणसेन बी आसरु छे। तारा चकराड़ण्या वारु कामेन साहरे,
तु तारा धरमेन अनसारे हामरी दुवान जपाप आपे।
तु ते ताकतेन कमर बादीन आपसी ताकत,
आखा बयड़ा काजे काठा ठुस करे।
तु ते दरीयान घुगवाराक,
ने झलकेन सुसवाराक,
ने देस-देसेन उदम करन्या माणसेक हुगराख देय।
धरतीन खुणे-कुपरे रवण्या,
आखा माणसे,
तारा चकराड़न्या वारु कामेन सहलाणी देखीन धाक भराय जाय;
तु उगुण सी बुडुण लग माणसेक जीतेन गीत गावाड़े।
ए भगवान, तारी नदी ते उगळती रवे।
तु धरती पर बेसकु फळ लीन आवे।
हीने रीते तु धरती काजे तीयार करे,
ने माणसे वाटे अन उबजाड़े।
तु खेड़ला खेते पर पाणी पाड़े,
ने तु खेतो काजे पाणी पाड़ीन भर देय,
ने धरती काजे पाणी पाड़ीन नरम कर देय,
ने मेर काजे वदाड़े।
तु भाती-भातीन मेर सी भलाय करीन, नवला सालेक पागड़ी बांद देदु;
भगवान तु बेसकु दयाळु छे, तु जां बी जाय, चां बरकत आपतु जाय।
उजाड़्या बयड़ान चारु नीळु-कच हंय रयु, ने असो लागे की,
बयड़ा खुसीन कमर बांद लेदा हय।
चारान जागाम गाडरा-बुकड़ा चरने बाजी रया;
ने मेर सी खेत ढाकाय गुया।
ने आखा खुस हय्न आयड़ी रया, ने खुसीन गीत गाय रया।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.