भजन सहीता 64

छुटकारा वाटे दुवा

भजन गावण्‌यान डाहला वाटे, दावुदेन मीसमर भजन

1भगवान, गरा मां मारो बुल सामळी ले।

वेरीन बीहाणा मां मारु जीव बचाड़ीन, मारी राखवाळी कर।

2कुहर्‌या ते मारनेन मुजगी कर रया, कुहराय करन्‌या धदड़ी रया;

हेरेसी तींद्‌रे सी मेसेक साताड़ीन बचाड़ ले।

3चे ते, आपसी जीप काजे तलवारेन तसी छर-छर कर रया;

ने चे हुटड़ान धंद्‌ली चड़ाय्‌न कड़वा बुलेन बीलखा उमाण रया।

4चे डुकाय्‌न, नी-गुनाळा माणसेन देणे तकाय रया; ने उचकाणुन बीलखी हापकीन दी रया,

ने काहनाक बी नी बीहता।

5चे कुहराय करनेम एक दीसरान जुर वदाड़े,

ने मनेन फांद मेलनेन वात करे;

ने कवे, “चो करतेला हामुक कुण देखसे?”

6ने चे कुहराय करनेन मुजगी करीन असा कवे,

“हामु पाक्‌की मुजगी कर लेदा, काहनाक बी पतु नी चाले।”

छाचलीन, माणसेन मन ते नी-छेव्‌या छे।

7बाकुन भगवान तींद्‌रे सर खाचीन देसे;

ने चे उचकाणुन घायेल हंय जासे।

8तीनुक खुदुत तींद्‌री जीप तींद्‌रो नुकसाण कराड़से,

ने तीनुक देखणेवाळा आखा माणसे मुणको हालाड़ी-हालाड़ीन हासी उडाड़से।

9तत्‌यार आखा माणसे बीही जासे;

ने भगवानेन बारामां गुण गावसे,

ने भगवान जो बी काम करलु, तीनी वात पर धीयान देसे।

10आखा धरमी, यहोवा भगवानेन साहरे खुस हय्‌न

तेरे आसरे जासे, आखा सुद्‌ला माणसे

भगवान पर बड़ाय करसे।