Bhilali Bible
भजन सहीता 63
पीसलु जीव भगवान मां आफरे
दावुद, यहुदान बयड़ा मां हतलु तीनी टेमे लिखलो दावुदेन मीसमर भजन
भगवान, तु मारु भगवान छे;
मे तुसेक बेसकु कुसीत करीन हेरो;
उजाड़ी बयड़ा मां, पाणी नी हंय तसु,
मारु जीव तारु पीसलु छे;
मारो डील लग तारी हर कर रयो।
असी हर करी-करीन मे तारा चुखला जागा मां तुसेक देख लेदु,
ने तारी ताकत ने तारु सेक बी देख लेदु।
तारो दया ने जीवाय सी बी वारु छे।
हेरेसी मारा हुटड़ा तारो गुण गाया करसे।
असु हर करी-करीन, मे जीवीस तीं लग, तुसेक वारु कवतु रय्स;
तार नाव सी दुवा करतु जाय्न मारा हात उचा करीस।
मारो जीव मानु चरबी ने चीकणला खाणा सी आफरी जासे,
ने मे खुसीन गीत गाय्स ने तारी बड़ाय कर्या करीस।
ने मे राते सुवणे करीन खाटली पर पड़ो ती तुसेक हेर करो,
ने हर घड़ी तार बाराम वीच्यार कर्या करो।
छाचलीन, तु ते मारु साहरु बणलु छे;
हेरेसी मे तारा पाखड़ा तळे खुसीन गीत गाय्स।
मारु जीव तारेत बाथलाय रवे;
ने तारु जेवड़्यु हात मेसेक समाळे।
बाकुन जे मारु जीव लेणे कर रया,
चे धरतीन नेचा पाताळ मां जाय पड़से।
दीसरा तीनुक तलवार्ये करीन मार नाखसे;
ने तींद्रो धड़, लेंड्या खाय जासे।
बाकुन मे जु भगवानेन नेवाड़लु राजु छे,
भगवानुत मां खुस हवसे;
ने जे भगवानेन छाची सगुन खाय, चे आखा गखळायसे;
काहाकी आखा झुट बुलन्यान बुलती बंद हंय गुयली।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.